بۆچی ئاگربەستی غەززە لەکاتی خۆیدا جێبەجێ نەکرا؟

ئاڤا نیوز

 

ئەمڕۆ یەکشەممە دوای تێپەڕبوونی چوار ڕۆژ بەسەر ڕاگەیاندنی ڕێککەوتنی ئاگربەستی غەززە، قەتەر دووپاتیکردەوە ئاگربەستی غەززە کەوتووەتە بواری جێبەجێکردنەوە. 

چیرۆکی سەرەکی: بڕیار وابوو ئەمڕۆ کاتژمێر 09:30ـی بەیانی بە کاتی هەولێر، ئاگربەستی نێوان ئیسرائیل و حەماس بکەوێتە بواری جێبەجێکردنەوە و قۆناغی یەکەمی ئاگربەستەکە بکرێت، بەڵام چەند کاتژمێرێک جێبەجێکردنی ئاگربەستەکە دواخرا.

 

ڕاگەیێنراوی فەرمی: سەرکردەیەکی باڵای بزووتنەوەی حەماس ڕایگەیاند،'' بۆردومانی ئیسرائیل بووە هۆکاری دواخستنی لیستی بارمتەکان، هاوکات ئەو بارمتانەی ئەمڕۆ ئازاد دەکرێن، لەوانەیە سەرباز یان هاووڵاتیی مەدەنی بن بەڵام سەرەڕای ئەوە لە پەیوەندی داین لەگەڵ بەرپرسانی قەتەر و میسر بۆ دڵنیابوون لە جێبەجێکردنی تەواوەتی ڕێککەوتنەکە''. 

 

لەلایەکی دیکەوە: سەرچاوەیەک لە نووسینگەی سەرۆکوەزیرانی ئیسرائیل ڕایگەیاندووە، لیستی ئەو سێ بارمتەیەی ئەمڕۆ ئازاد دەکرێن، گەیشتووەتە دەستی بەرپرسانی ئیسرائیل.

 

باکگراوند: لە 15-01-2025، ئەمریکا، قەتەر و میسر کە نێوەندگیریی ئاگربەستی غەززەیان دەکرد، ڕازیبوونی ئیسرائیل و حەماسیان لەسەر ئاگربەست و ئاڵوگۆڕی بارمتە و بەندکراوەکان ڕاگەیاند.