بەهۆی ئاگرەكەی هۆتێل بۆڵۆی توركیا 9 کەس دەستگیر کراون

ئاڤا نیوز

بەهۆی ئەو ئاگرەی دوێنێ لە هۆتێلێکی ناوچەی گەشتیاری لە تورکیا کەوتەوە 76 کەس گیانیان لەدەستدا و 51 کەسیش بریندار بوون،  بەهۆی ڕووداوەکەوەش 9 کەس دەستگیرکراون.

چیرۆکی سەرەکی: دوێنی دووشەممە ئاگر لە نهۆمی چوارەمی  هۆتێلی کارتاڵکەی شاری بۆڵوی تورکیا کەوتووەتەوە، بە هۆیەوە تا ئێستا 76 کەس گیانیان لەدەستداوە و 51 کەسیش بریندار بوون.

ڕاگەیێنراوی فەرمی: تیمەکانی ئاگرکوژێنەوەی ناوچەکە ڕایانگەیاند هۆکاری خێرا گەورەبوونی ئاگرەکە بەهۆی ئەوە بووە کە ڕووکەشی هوتێلەکە بە دار داپۆشرابوو، بەوهۆیەوە ئاگرەکە زووتر تەشەنەی کردووە هەروەها لە هۆتێلەکە سیستمی ئاگرکوژێنەوەی زۆری تێدا نەبووە و پلیکانەى فریاگووزاری بۆ کاتی لەناکاو نەبووە.

زانیاریی زیاتر: بەهۆی ڕووداوەکەوە دەزگا ئەمنییەکانی تورکیا خاوەنی هۆتێلەکە و هەشت کەسی دیکەشیان بە تۆمەتی کەمتەرخەمی و کەوتنەوەى ئاگرەکە دەستگیر کردووە.

لە لایەکی دیکەوە: عەلی یەرلیکایا وەزیری ناوخۆی تورکیا ڕایگەیاند، هەرچی پێویست بێت بۆ ساردکردنەوەی ئازاری دڵمان بە دڵنیاییەوە ئەنجامی دەدەین و هەروەها حکومەتی تورکیا ئەمڕۆی وەک ماتەمینی بەهۆی ئەو ڕووداوەوە لە تورکیا ڕاگەیاند.