پووتین سەرەخۆشی لە ئەردۆغان دەکات

ئاڤا نیوز

 

ڤلادیمێر پووتین، سەرۆکی ڕووسیا، پەیامی هاوخەمی بۆ ڕەجەب تەیب ئەردۆغان، سەرۆککۆماری تورکیا  لەبارەی ئاگرکەوتنەوە لە هۆتێلێک لە شاری بۆڵۆی نارد و ئامادەیی وڵاتەكەی بۆ هاوكاری دەردەبڕێت.

 

وێنە گەورەکە: ڕۆژی 21-1-2025، ئاگر لە نهۆمی چوارەمی هۆتێلێک لە ناوچەی کارتاڵکایای شاری بۆڵوی تورکیا کەوتووەتەوە، كە بووە هۆی گیان لەدەستدانی 76 كەس. تورکیاش یەک ڕۆژ ماتەمینی گشتیی ڕاگەیاند.

 

ڕاگەیێنراوی فەرمی: ڤلادیمێر پووتین، لە پەیامەکەیدا کە لە ماڵپەڕی کریملن بڵاوکراوەتەوە ڕایگەیاند: ''دڵگرانی و هاوخەمی خۆمان بۆ ڕووداوی دڵتەزێنی ئاگرکەوتنەوەکەی تورکیا و ڕەجەب تەیب ئەردۆغان سەرۆککۆماری وڵاتەکە و کەسوکاری قووربانیانی ڕووداوکە دەردەبڕین و هیوای خێرا چاکبوونەوە بۆ بریندارانی ڕووداوەکە دەخوازم.''

 

ژمارەکان وادەڵێن: بە پێ دواین ئاماری وەزارەتی ناوخۆی تورکیا، تاوەکو ئێستا 76 کەس گیانیان لەدەست داوە،  یاریدەدەری سەرۆکشارەوانی بۆڵو و بەرێوەبەری ئاگرکوژێنەوەی بۆڵو لەگەڵ 11 كەسی دیکە بە تۆمەتی كەمتەرخەمی لە هۆكاری كەوتنەوەی ئاگرەكە، دەستگیركراون.