مەسرور بارزانی: بە پێشنیازێکی بەغدا شۆک بووین

ئاڤا نیوز

 

لەبارەی پێشیازێکی بەغدا دەربارەی پرۆژەیاسای بودجە و هەناردەکردنەوەی نەوتی هەرێمی کوردستان، سەرۆکوەزیران مەسرور بارزانی ڕایگەیاند، "بە پێشنیازەکە تووشی شۆک بووین."

 

وێنە گەورەکە: دوای چەندین کۆبوونەوە و هەوڵ و ماندووبوون بۆ ئەوەی یاسای بودجەی گشتیی فیدراڵ لەلایەن ئەنجوومەنی نوێنەرانەوە هەموار بکرێتەوە و هەناردەکردنی نەوتی هەرێم دەست پێ بکاتەوە، هەرچەندە خوێندنەوەی یەکەم و دووەمیشی بۆ کرا و لەنێوان هەولێر و بەغدا ڕێککەوتنیش هەبوو، بەڵام لە دوایین ساتەکاندا دەنگی لەسەر نەدرا.

 

زانیاریی بەدەستهاتوو: بەگوێرەی زانیارییەکانی ئاڤا، حکومەتى عێراق پێشنیازێکی نوێی کردووە، دەبێت هەرێمی کوردستان سەرجەم داهاتی فرۆشی نەوت و گاز و بەرهەمە نەوتییەکان، چ لە ناوخۆ و چ لە دەرەوە، بەتەواوی ڕادەستی خەزێنەی گشتیی عێراق بکات.

 

لێدوانی فەرمی: لەمبارەیەوە سەرۆکوەزیران مەسرور بارزانی بە ئاژانسی بلومبێرگی ئەمریکی ڕاگەیاندووە، حکومەتی هەرێمی کوردستان شۆک بووە بەوەی پەرلەمانی عێراق دەنگدانی لەسەر هەمواکردنەوەی یاسای بودجە و تێچووەکانی بەرهەمهێنان بۆ هەناردەکردنەوەی نەوتی کوردستان دواخستووە. ئەگەریشی هەیە بەربەستی نوێ بۆ دووبارە دەستکردنەوە بە هەناردەی نەوت دروست بکرێت.