ئەردۆغان: لە هەڵبژاردنی داهاتوو زۆر زیاتر لە 50%ی دەنگی تورکیا دەبەینەوە

ئاڤا نیوز

رەجەب تەیب ئۆردوغان، سەرۆککۆماری تورکیا لە وتاری کردنەوەی کۆنگرەی حیزبەکەی لەشاری وان بەڵێنی خزمەتی زیاتر بە خەڵکی شارەکە دەدات و دەڵێت، "ئێمە تەنیا بە وەبەرهێنان و پڕۆژە نا، بەڵکو بە خۆشەویستیی و هاوڕێیەتییەوە لە خەڵکی وان  نزیک دەبینەوە".

چیرۆکی سەرەکی: کۆنگرەی 8ـی ئاسایی ئاکپارتی لە شاری وان لە باکووری کوردستان کرا، ڕەجەب تەیب ئەردۆغان، سەرۆککۆماری تورکیا لەوێ گوتارێکی پێشکەش کرد و جارێکی دیکە جەختی لە برایەتی کورد و تورک و پێکهاتەکانی دیکە کردەوە.

لێدوانی فەرمی: ئەردۆغان، لە گوتارەکەیدا ڕایگەیاند:

- بەبێ جیاوازی تورک و کورد و عەلەوی و زازایی، هەموو لە باوەش دەگرین.

- لە هەڵبژاردنی ساڵی 2028 زۆر زیاتر لە 50%ی دەنگی تورکیا بەدەست دێنین، ئاکپارتی سێ لەسەر یەکی شارەوانییەکانی تورکیا بەدەست دێنێت، لەسەر ئەو بنەمایەش ئامادەکاریی دەکەین و تورکیایەکی بەهێز بۆ نەوەکانمان جێ دەهێڵین.

لەلایەکی دیکەوە: سەرۆککۆماری تورکیا، خۆشەویستی خۆی بۆ خەڵکی شاری وان دووپاتکردەوە، بەوەی هیچ ماڵێک نامێنێت لە دەرگای نەدەن و میوانداری نەکەن، گوتی: داهاتووی وان، داهاتووی تورکیایە و خەڵکی وان بە کلتووری ڕەسەنی تایبەت بە خۆیان لە نێو تورکیا دەگەشێتەوە.