تورکیا شەهیدکردنی دوو پاسەوانە کوردەکەی سەر سنوور سەرکۆنە دەکات

ئاڤا نیوز 

 

ئۆجو کەچێلی، گوتەبێژی وەزارەتی دەرەوەی تورکیا، نیگەرانی و هاوخەمی وڵاتەکەی بۆ شەهیدکردنی دوو پاسەوانی سەر سنوور کە کوردبوون لەلایەن چەکدارانی پەکەکە ڕاگەیاند و دەڵێت: بەم ڕووداوە ڕووی ڕاستی پەکەکە دەرکەوت. 

 

چیرۆکی سەرەکی: ڕۆژی 24-1-2025 لە ئەنجامی هێرشکردنە سەر خاڵێكی پاسەوانانی سنوور لە سنووری ئیدارەی سەربەخۆی زاخۆ، دوو لە پاسەوانەكانەکان شەهیدکران و یەكێكی دیكەش بریندار بووە. 

 

لێدوانی فەرمی: کەچێلی گوتی: نیگەرانی قووڵی خۆمان بۆ ئەو ڕووداوە دەردەبڕین، هیوای چاک بوونەوە بۆ بریندارەکان دەخوازین، پێشووتریش وتومانە پەکەکە هەڕەشەیە بۆ ئەمنییەتی ناوچەکە، ڕوونە کە سەرەوەرەی خاکی عێراق پێشێل دەکات، بەم ڕووداوە ڕووی ڕاستی پەکەکە دەرکەوت.

 

ئەوەشی خستەڕوو کە تورکیا جارێکی دیکە جەخت لەوە دەکاتەوە کە لەگەڵ عێراق بەردەوام دەبن لە هاوبەشی کارکردن بۆ بەرەنگاربوونەوەی پەکەکە لەو سنوورە.