واشنتن وادەی ئاگربەستی لوبنان درێژ دەکاتەوە

ئاڤا نیوز

 

دوای تەواوبوونی وادەی ئاگربەستی 60 ڕۆژەی نێوان ئیسرائیل و حیزبوڵڵای لوبنان، کۆشکی سپی ئاگربەستەکە تا مانگی داهاتوو درێژدەکاتەوە.

 

چیڕۆکی سەرەکی:  لە 23 ئەیلوول 2024، هێزی ئاسمانی ئیسرائیل هێرشیکردە سەر باشووری لوبنان، بەهۆیەوە جەنگ و وێرانکاری ڕووی لەو ناوچەیە کرد، دوای چەندین هەوڵی ناوخۆیی و دەرەکی ئاگربەست لە 27-11-2024، لە نێوان حیزبوڵڵا و ئیسرائیل ڕاگەیێنرا، دواجار لە 26-1-2025، ڕێککەوتنی 60 ڕۆژەی ئاگربەست بەفەرمی کۆتاییهات. 

 

ڕاگەیێنراوی فەرمی: کۆشکی سپی لەو بارەیەوە ڕایگەیاند، ڕێککەوتنی ئاگربەستی نێوان ئیسرائیل و لوبنان تاوەکو 18ـی شوبات کاری پێدەکرێت، هاوکات دانوستاندن سەبارەت بە گەڕانەوەی ئەو هاووڵاتییە لوبنانییانەی کە لە 7ـی ئۆکتۆبەرەوە دەستبەسەرکرابوون لەگەڵ هەر یەکە لە حکومەتی ئەمریکا، ئیسرائیل و لوبنان دەستپێدەکاتەوە.

 

زانیاریی بەدەستهاتوو: تاوەکو ئێستا هیچ لایەنێک لە 'لوبنان و ئیسرائیل'، وەڵامی ئەم لێدوانەی کۆشکی سپی-یان نەداوەتەوە.

 

باکگراوند: بەهۆی شەڕی لوبنانەوە، نزیکەی چوار هەزار هاووڵاتی لوبنان بەهۆی بۆردوومانەوە کوژراون و زیاتر لە یەک ملیۆن هاووڵاتیش ئاوارەبوون، لەگەڵ ڕاگەیاندنی ئاگربەستی 60 ڕۆژە بەگوێرەی خاڵەکانی ڕێککەوتنەکە پێویست بوو حیزبوڵلا چەک دابنێت و ئیسرائیلیش هێزەکانی لە باشووری لوبنان بکشێنێتەوە.