ئۆپەراسیۆنە هاوبەشەکانی عێراق: داعش توانای ئەنجامدانی هێرشی نەماوە

ئاڤا نیوز

جێگری فەرماندەی ئۆپەراسیۆنە هاوبەشەکانی عێراق دەڵێت، داعش زەبری توندی بەرکەوتووە و ئەو ڕێكخراوە ئێستا توانای ئەنجامدانی هێرش، ڕووبەڕووبوونەوە و کۆنتڕۆڵکردنی خاکی نەماوە.

وێنە گەورەکە: هەرچەندە لە ساڵی 2017ـەوە داعش وەکو ڕێکخراوێک کە خاکی لەژێر دەستدابێت، کۆتاییهاتنی ڕاگەیێنراوە، بەڵام شانە نوستووەکانی ڕێکخراوەکە ماون و هەندێکجار هێزە ئەمنییەکان و هاووڵاتیانی عێراق بەئامانج دەگرن.

لێدوانی فەرمی: فەریق روکن قەیس محەممەداوی، جێگری فەرماندەی ئۆپەراسیۆنە هاوبەشەکانی عێراق لەکۆبوونەوەیدا لەگەڵ بەشێک لە فەرماندە سەربازییەکان لە بەغدا، ئاماژەی بەوەكرد، هەوڵە هەواڵگرییەکان و ئۆپەراسیۆنەکان کاریگەری خۆیان هەبووە و وایکردووە داعش توانای هێرشکردن، کۆنتڕۆڵی خاک و ئەنجامدانی هێرش بۆ خۆ سەلماندنی نەمێنێت.

بەوتەی ئەو فەرماندە سەربازییە، توانای هێزە ئەمنییەکان بۆ ڕووبەڕووبوونەوەی تاوان بەشێوەیەکی بەرچاو گەشەی کردووە و دامەزراوە ئەمنییەکانیش بەشێوەیەکی پیشەیی کاردەکەن، محەممەداوی داواشیکردووە لەبواری ئەمنیدا چاوپۆشیکردن و ڕۆتین نەهێڵرێت و دەبێت کارە سەربازیی و ئەمنییەکان بەشێوازێکی ڕێکخراو و لەکاتی دیاریکراودا ئەنجام بدرێن.