لە هەرێمی کوردستان کڕین و فرۆشتن بە توێژینەوەی دەرچوون لە زیادبووندایە

ئاڤا نیوز

لە هەرێمی کوردستان تادێت کڕین و فرۆشتن بە توێژینەوەی دەرچوون لە زیادبووندایە و بەگوێرەی بەدواداچوونەکانی ئاڤاش لە هەندێک شوێنیش بە ئاشکرا ڕێکلامی بۆ دەکرێت.

چیرۆکی سەرەکی: کڕین و فرۆشتن بە توێژینەوەی دەرچوون تادێت زیاتر دەبێت، ئەمە لە کاتیکدایە کە ئامادەکردنی توێژینەوە ئەرکی سەر شانی قوتابییە پێش دەرچوونی لە زانکۆ و پەیمانگاکان دەبێت ئەنجامی بدات، ئاڤا میدیا بەدواداچوونی بۆ ئەم بابەتە کردووە، لە چەند شوێنێک بە ئاشکرا ڕیکلامی بۆ دەکرێت و نرخەکانیشی بە پێی ئاستی توێژینەوەکانە؛ واتا چەند ئامادەکارەکە خۆی بە توێژینەکەوە ماندوو بکات پارەکە زیاترە. 

زانیاریی تایبەت: یەکێک لەو کەسانەی کاری ئامادەکردن و فرۆشتنی توێژینەوە دەکات باس لەوە دەکات ساڵانە خواست لەسەر کڕینی توێژینەوە زیاتر دەبێت و بە "کۆمەڵ پەیوەندیم پێوە دەکەن، بەشێکیان لێی نازانن و بەشێکی دیکەیان نایانەوێت خۆتان ماندوو بکەن."

ئەمەش بزانە: ئامادەکردنی توێژینەوە لە مانگی یەکی هەموو ساڵێک تاکو مانگی چوار بەردەوام دەبێت، لە زانکۆکانیش وانەیەکی تایبەت بە شێوەیەکی ئەكادیمی بۆ بەرچاوڕوونی دەخوێندرێت بەڵام بەشێک لە قوتابیانی زانکۆ و پەیمانگاکان تەنانەت ماستەر و دکتۆراش توێژینەوەکان دەکڕن.