ئەنجوومەنی وەزیران لەبارەی پرسی مووچە کۆدەبێتەوە

ئاڤا نیوز

 

ئەنجوومەنی وەزیرانی هەرێمی کوردستان کۆدەبێتەوە و ڕاپۆرتی شاندی هەرێمی کوردستان لە بەغدا تاوتوێ دەکات.

 

وێنە گەورەکە: دوای چەندین ساڵ هەبوونی گرفت لە بەردەم ناردن و نەناردنی مووچە و بودجەی هەرێمی کوردستان لەلایەن حکومەتی عێراقەوە، هەولێر و بەغدا گەیشتنە ڕێککەوتن، دوای پەسەندکردنی هەمواری یاسای بودجەش، وەزارەتی نەوتی عیراقی هەوڵەکانی بۆ هەناردەکردنەوەی نەوتی هەرێمی کوردستان دەستپیکردووە.

 

ئەوەی پێویستە بیزانیت: سبەی چوارشەممە 4-2-2025، ئەنجوومەنی وەزیرانی هەرێمی کوردستان كۆبوونەوەی هەفتانەی دەکات، تەوەرە سەرەكییەكانی کۆبوونەوەکەش بودجە، مووچە، خانەنشینی و ڕاپۆرتی ئەو شاندە دەبێت کە لە بەغدا گەڕاونەتەوە.

 

گۆشەیەکی دیکەی دیمەنەکە: وەزارەتی دارایی عێراق بڕی 958 ملیار و 12 ملیۆن و 332 هەزار دیناری خستە سەر هەژماری بانکی وەزارەتی دارایی و ئابووری هەرێمی کوردستان، وا بڕیارە وەزارەتی دارایی بە زووترین کات لیستی مووچە ڕابگەیێنرێت و  دەست بە دابەشکردنی مووچەی مانگی یەک بکرێت.

 

بڕگەی (ج) لە ماددەی 12ی یاسای بودجە کە دەنگی لەسەر درا، تییدا هاتووە:

 

- وەزارەتی دارایی عێراق لە خەرجی سیادی قەرەبووی حکومەتی هەرێمی کوردستان دەکاتەوە.

-لایەنێکی ڕاوێژکاری هونەریی نێودەوڵەتی لە ماوەی 60 ڕۆژدا خەرجی هەناردە و گواستنەوەی نەوتی هەرێمی کوردستان دیاری دەکات، ئەگەر لەو ماوەیەدا (دیاریکردنی لایەنەکە) جێبەجێ نەکرا، ئەنجوومەنی وەزیرانی عێراق ئەو لایەنە نێودەوڵەتییە دیاری دەکات.

- ئەو لایەنە نێودەوڵەتییە مەزەندەی تێچووی بەرهەمهێنان و گواستنەوەی نەوت دەبێت و ڕاپۆرتی خۆی دەداتە لایەنە پەیوەندیدارەکان.

- دەستبەجێ هەناردەی نەوتی هەرێمی کوردستان ڕادەستی کۆمپانیای سۆمۆ بکرێت، لەم قۆناغەدا وەزارەتی دارایی فیدراڵ بۆ بەرهەمهێنان و گواستنەوەی هەر بەرمیلێک نەوت 16 دۆلار خەرج دەکات.