سەرۆکی دەزگای میتی تورکیا بە سەردانێکی ڕانەگەیێنراو گەیشتە ئێران

ئاڤا نیوز

سەرۆکی دەزگای هەواڵگری نیشتیمانی تورکیا (میت) بە سەردانێکی ڕانەگەیێنراو گەیشتە تارانی پایتەختی ئێران.

چیرۆکی سەرەکی: ئیبراهیم کاڵن، سەرۆکی دەزگای هەواڵگری تورکیا بە سەردانێکی لەناکاو گەیشتە ئێران و لەگەڵ عەلی ئەکبەر ئەحمەدییان، سکرتێری ئەنجومەنی باڵای ئاسایشی نیشتمانی ئێران لە تارانی پایتەخت کۆبووەوە.

زانیاری بەدەستهاتوو: بەپێی ئاژانسی هەواڵی تەسنیمی ئێران پەیوەندییەکانی هەردوو دەوڵەت و پێشهاتە ناوچەییەکان و دوایین دۆخی سووریا باسیان لێوە کراوە و هەردوولا جەختیان لە بەردەوامی و بەهێزکردنی پەیوەندییەکانی نێوانیان و هەڵوێستی هاوبەشیان لە سەر پرسەکان کردۆتەوە.

ئەوەی پێویستە بیزانیت: دوای ڕووخانی ڕژێمی بەشار ئەسەد لە سووریا لە لایەن هێزە ئۆپۆزسیۆنەکانی ئەو وڵاتە بە پشتیوانی تورکیا، پەیوەندیەکانی نێوان ئێران و تورکیا ڕووی لە گرژی و ساردبوونەوە کرد و ئەم سەردانەی سەرۆکی میت بۆ ئێران یەکەم سەردانی فەرمی و گفتووگۆی نێوان هەردوو وڵاتە دوای ڕوخانی دەسەڵاتی بەشار ئەسەد.