پارتی و یەکێتی گفتوگۆ لەسەر دابەشکردنی پۆستەکان دەکەن

ئاڤا نیوز

هەفتەی داهاتوو شاندی دانووستانکاری پارتی و یەکێتی سێهەمین کۆبوونەوەی خۆیان بۆ گفتوگۆکانی پێکهێنانی حکومەت دەکەن، سەرۆکی شاندی باڵای پارتی و یەكێتیی کۆدەبنەوە، گفتوگۆ لەسەر ڕەشنووسی لیژنەی تەکنیکی هەردوولا  و دابەشکردنی پۆستەکانی کابینەی دەیەم دەکەن.

وێنە گەورەکە: پارتی و یەکێتی وەک براوەی یەکەم و دووەمی هەڵبژاردنەکانی خولی شەشەمی پەرلەمان دوو کۆبوونەوەیان لەسەر ئاستی باڵا لە پیرمام و دەباشان کردووە، تا ئێستا پێنج کۆبوونەوەی تەکنیکیش لەنێوان هەردوولایان کراوە، هەنگاو بۆ پێکهێنانی کابینەی دەیەم دەنێن.

لێدوانی فەرمی: هۆشیار زێباری، ئەندامی دەستەی کارگێڕی مەکتەبی سیاسیی پارتی دیموکراتی کوردستان دەڵێت،

٠ هەفتەی داهاتوو لەگەڵ یەکێتی کۆدەبینەوە و گفتوگۆ لەسەر دابەشکردنی پۆستەکان دەکەین.

٠ بۆ ئامادەکردنی کارنامەی کابینەی نوێی حکومەتی هەرێمی کوردستان گەیشتووینەتە قۆناغێکی باش و پێشکەوتوو.

٠ لە هەفتەی داهاتووەوە لەگەڵ هاوبەشەکانمان و بەتایبەت هاوبەشی سەرەکیمان یەکێتی نیشتیمانی کوردستان، دەست بە گفتوگۆ دەکەین بۆ دابەشکردنی سەرۆکایەتییەکان و پۆستەکانی دیکە.

دۆخەکە ئەرێنییە و پێشبینی دەکەین لە دوو مانگی داهاتوودا حکومەتی هەرێمی کوردستان پێکبهێنرێت، لەوە زیاتر پێکهێنانی درێژە ناکێشێت.

ئارامی باکوور و ڕۆژهەڵاتی سووریا بۆ ئێمە گرنگە، پشتیوانیش لە یەکڕیزی کورد لەو وڵاتە دەکەین بۆ گفتوگۆکانیان لەگەڵ دیمەشق.

هەوڵدەدەین ڕووبەڕووبوونەوەی سەربازی لەنێوان هەسەدە و تورکیا دووربخەینەوە، داواشمان لە هەسەدە کردووە لە پەکەکە دووربکەوێتەوە.

ئەمەش بزانە: ئەو ڕەشنووسەی لیژنەی تەکنیکی ئامادەیان کردووە، دەسەڵاتی پۆستە باڵاکانی هەرێمی کوردستان، هەیکەلییەتی حکومەت و بنەما سەرەکییەکانی حکومڕانی تێدا جێگیرکراوە، ئەگەر لە کۆبوونەوەی لیژنەی باڵا تێبینی لەسەر ڕەشنووسەکە دروست نەبێت، هەنگاوەکان بۆ پێکهێنانی کابینەی دەیەمی حکومەتی هەرێمی کوردستان نزیکتر دەبێتەوە.