24 پارێزگای ئێران بەهۆی بێکارەبایی فەرمانگە و قوتابخانەکانیان داخست

ئاڤا نیوز

 

 

لە 24 پارێزگای ئێران بەهۆی نەبوونی کارەبا دامودەزگا فەرمییەکان و قوتابخانەکان داخران.

 

چیرۆکی سەرەکی: بێ کارەبایی ماڵی دانیشتووانی زیاتر لە 24 پارێزگای ئێران و ڕۆژهەڵاتی کوردستانی تاریک کردووە و گەورەبوونی گرفتەکەش کێشەی بۆ دەسەڵاتدارانی ئەو وڵاتە دروستکردووە، تەنانەت بووەتە کێشە لە نێوان وەزارەتی کارەبا و وزەی ئێران بەمەش ئێستا زیاتر لە 32%ـی دانیشتووانی ئێران بە تەواوەتی ژیان لە بێکارەبایی بەسەر دەبەن.

 

ڕاگەیێنراوی فەرمی: وەزارەتی نەوت کە سەرچاوەی بەرهەمهێنانی کارەبای وڵاتی ئێرانە ڕایگەیاند: وەزارەتی کارەبا بەهۆی خراپ ئیدارەدانی سەرچاوەی سووتەمەنی نەیتوانیوە بەگوێرەی پێویست کارەبا بەرهەم بێنێت و ڕێگری لە فراوانبوونی قەیرانەکە بکات.

 

زانیاریی زیاتر: بەپێی میدیاکانی ئێران لە ماوەی 24 کاتژمێری ڕابردوودا تارانی پایتەخت چەند جارێک توشی بێکارەبایی سەرتاسەری بووەتەوە، ئەمەش وای کردووە لەگەڵ نەمانی کارەبا و سوتەمەنی لەو وڵاتەدا وەزیرانی کارەبا و نەوت یەکدی بە بەرپرسیاری بابەتەکە تۆمەتبار بکەن و هاووڵاتییانیش ناڕەزایی دەردەبڕن.