موقتەدا سەدر: نابێت هیچ زیندانییەک ئەشکەنجە بدرێت

ئاڤا نیوز

ڕێبەری ڕەوتی نیشتمانی شیعە داوا دەکات، ئەگەر هەر زیندانییەک دووچاری ئەشکەنجەدان یان سووکایەتی بووەوە، دەتوانێت بە ڕێگەی شەرعی و یاسایی مافەکانی بەدەست بهێنێت.

چیرۆکی سەرەکی: دوای ئەوەی موقتەدا سەدر، ڕێبەری ڕەوتی نیشتمانی شیعە لە کاری سیاسی دوورکەوتەوە، ئێستا لە نووسینگەکەی خۆی لەپارێزگای نەجەف بەردەوام وەڵامی پرسیاری هەوادار و لایەنگرانی لە چوار چێوەی شەرع و یاسا دەداتەوە.

ڕاگەیێنراوی فەرمی: نووسینگەی تایبەتی سەدر نوسراوێکی بەواژۆی ڕێبەری ڕەوتی نیشتمانی شیعە بڵاوکردووەتەوە و تێیدا هاتووە:

- قوربانیانی دەستی جەللادەکانی گرتوخانە و زیندانەکان دەتوانن پەنا بۆ شەرع و یاسا ببەن و هەموو مافەکانیان بگەڕێننەوە.

- سەدر داوا لەو کەسانە دەکات، ئەگەر بەهەر هۆکارێک دووچاری ئەشکەنجە و سوکایەتی لە لایەن دەزگا ئەمنی و سەربازییەکان بوونەوە، سکاڵای شەرعی و یاسایی لە دژیان تۆماربکەن تاوەکو مافەکانیان بۆ بگەڕێتەوە.

ئەوەی پێویستە بیزانیت: لەگەڵ ئەوەی بە پێی یاسای نێونەتەوەیی ئەشکەنجە و سوکایەتی پێکردن بە بەندکراو قەدەغەکراوە، عێراقیش لەساڵی 2011 لەدژی ئەشکەنجەدان واژۆی لەسەرئەو ڕێککەوتنە نێودەوڵەتییە کردووە، بەڵام ڕاپۆرتە نێودەوڵەتییەکان، عێراق بەئەشکەنجەدانی دەستگیرکراوان لەزیندانەکانیدا تاوانبار دەکەن.