زێلێنسکی داوای دروستکردنی "سوپایەکی ئەوروپی" دژ بە هەژموونی ڕووسیا دەکات

ئاڤا نیوز

 

ڤۆلۆدیمیر زێلێنسکی، سەرۆکی ئۆکراینا داوا لە هاوپەیمانە ئەوروپییەکانی دەکات هەنگاو دژی ڕووسیا بگرنەبەر و کار بۆ ڕێگریکردن لە ڕێکەوتنی ئەمریکییەکان لەگەڵ ڕووسیا بکەن ئەگەر بێتو کیێڤ بەشدار نەبێت لە گفتوگۆکان.

 

چیرۆکی سەرەکی: زێلێنسکی لە پانێڵێکی کۆنفرانسی ئاسایشی میونشن لەبەردەم دەیان سەرکردەی جیهان هۆشداری دا لەوەی ئەو سەردەمە بەسەرچوو کە ئەمریکا پشتگیری ئەوروپای دەکرد. زێلینیسکی لە میانی پانێڵەکەدا وتی، "وای دەبینم کاتی ئەوە هاتووە سوپایەکی ئەورووپی دروست بکەین".

 

چی ڕوویدا؟ دۆناڵد ترەمپ، سەرۆکی ئەمریکا هەفتەی ڕابردوو، یەکەم پەیوەندی تەلەفۆنی دوای گەڕانەوەی بۆ کۆشکی سپی لەگەڵ هاوتا ڕووسییەکەی ڤلادمیر پووتین ئەنجامدا و ڕێککەوتن دەست بە گفتوگۆ بکەن بۆ کۆتاییهێنان بە جەنگ، ئەمەش بەبێ ئەوەی ڕاوێژ بە وڵاتانی ئەوروپا بکات کە ماوەی سێ ساڵە لە پاڵ ئەمریکا پشتیووانی لە ئۆکراینا دەکەن.

ئەوەی پێویستە بیزانیت: دوای پەیوەندییە تەلەفۆنییەکەی لەگەڵ پووتین، ترەمپ پەیوەندی بە زێلینسکیەوە کرد، بەڵام هەوڵی نەدا پێشوەختە لەگەڵیدا ڕێکبکەوێت لەسەر ستراتیژی دانووستاندن لەگەڵ ڕووسیا.