ئەنجوومەنی وەزیران لەسەر چەند پرسێک کۆدەبێتەوە

ئاڤا نیوز 

ئەنجوومەنی وەزیرانی هەرێمی کوردستان کۆدەبێتەوە و تاوتوێی چەند پرسێک دەکات و گرنگترینیان پرسی هەناردەکردنەوەی نەوتی کوردستانە. 

 

وێنە گەورەکە: ئەنجوومەنی وەزیرانی هەرێمی کوردستان بە سەرپەرشتی سەرۆکوەزیران مەسرور بارزانی کۆبوونەوەی ئاسایی خۆی دەکات و لە کۆبوونەوەکە گفتوگۆ لەسەر سێ تەوەر دەکات.

 

زانیاریی بەدەستهاتوو: ئەنجوومەنی وەزیرانی هەرێمی کوردستان لەسەر ئەم پرسانە دەکات: 

 

بڕگەی یەکەم: خستنەڕووی پوختەی بەشداریی شاندی باڵای حکومەتی هەرێمی کوردستان بە سـەرۆکایەتیی سـەرۆکوەزیـران لە لوتکەی جیهانیی حکومەتەکان لە دوبەی لە ڕۆژانی 13/11-2-2025  و نـوێکردنەوەی یاداشـتی لێکتەگەیشتنی نێـوان حکومەتی هەرێمی کوردستان و حکومەتی ئیمارات بۆ هەماهەنگی نێوان هەردوو حکومەت لە کەرتە جیاوازەکان بۆ 5 سـاڵی دیکە و ڕاسپاردنی وەزارەتەکان بۆ کاری پێویست لەمبارەیەوە، هاوکات بابەتى پێــداچوونەوە و ڕێکخســتنەوەى بابەتی شــاند و ســەردانە فەرمییەکــانى بەرپرســان لە وەزارەت و لایەنە نەبەستراوەکان بە وەزارەت بۆ دەرەوەى هەرێمی کوردستان ئەم بڕگەیە لەلایەن سەرۆکوەزیران دەخرێتەڕوو بۆ ئەنجوومەن.

بڕگەی دووەم: خستنەڕووی ڕاپۆرتى لیژنەى هاوبەشى نێوان حکومەتى هەرێمی کوردستان و حکومەتى فیدراڵى تایبەت بە یەکخستنى ڕێکارەکـانى کوالێتی کۆنترۆڵ و پۆلێنکردنى بەڵێندەران، ناسراو بە لێژنەى فەرمـانى دیـوانى ژمـارە (79س) سـاڵى 2024 کە یەکێک بـوو لە دەرئەنجامەکـانی کۆبـوونەوەى هاوبەشـی هەردوو ئەنجومەنى وەزاریی ئـابوورى هەرێـمی کوردستان و فیـدراڵ لە مـانگی نۆی ساڵى 2024، پوختەی ڕاپۆرتی تایبەت بەم بڕگەیە لەلایەن لیژنەی هاوبەشی وەزارەتە پەیوەندیدارەکانی هەرێمی کوردستان دەخرێتەڕوو بۆ ئەنجوومەن کە میوانداری دەکرێن بۆ ئامادەبوون لە کۆبوونەوەی ئەنجوومەن بۆ ئەم بڕگەیە.

 بڕگەی سێیەم: خستنەڕووى دەرئەنجامى کۆبوونەوەى چاوەڕوانکراوی هاوبەشى وەزارەتى سامانە سرووشـتییەکان و وەزارەتـى نەوتـى فیدراڵى لە هەولێر لە ڕۆژی 2025-2-18 تایبەت بە ڕێکار و میکانی مەکانی جێبەجێکردنى یاساى هەموارى یەکەمى یاساى بودجەى گشتى عێراقى فیدراڵ تایبەت بە هەناردەکردنەوەى نەوتى هەرێمى کوردستان، ئەم بابەتە لەلایەن وەزیرى سامانە سروشتییەکان بەوەکالەت دەخرێتەڕوو بۆ ئەنجومەن.