جووتیارەکەی پەلکانە بۆ چارەسەرکردن هێنراوەتە هەولێر

 

ئاڤا نیوز

جووتیارێکی گوندی پەلکانە لە سنووری پارێزگای کەرکووک، لەسەر ڕاسپاردەی سەرۆکوەزیران مەسرور بارزانی لە هەولێر چارەسەری تەندروستی  بۆ دەکرێت.

وێنە گەورەکە: دوای گرژی و ئاڵۆزییەکانی نێوان جووتیارانی کورد و سوپای عێراق لە گوندی شەناغە،  گرتە ڤیدۆیەکی مام سابیر عومەر کە جووتیارێکی کوردە لە گوندی پەلکانە بڵاوکرایەوە، باس لەوە دەکات بەهۆی نەخۆشییەوە ناتوانێت بچێت بەرگری لەو جووتیارانەی شەناغە بکات.

لێدوانی فەرمی: د.سامان بەرزنجی، وەزیری تەندروستی حکومەتی هەرێمی کوردستان، بە ئاڤا میدیای ڕاگەیاند: لەسەر فەرمان و ڕاسپاردەی سەرۆکوەزیران مەسرور بارزانی، ئەمڕۆ چوارشەممە مام سابیر عومەر بۆ هەولێر گوازرایەوە بۆ ئەوەی چارەسەری تەندروستی بۆ بکرێت.

لەلایەکی دیکەوە: مام سابیر عومەر، جووتیارە کوردەکەی گوندی پەلکانەی سنووری پارێزگای کەرکووک، بە ئاڤا میدیای ڕاگەیاند: گورچیلەکانم لاوازبوون، ئەگەر تەندروستیم باشتر ببێت، تاوەکو مردن بەرگری لە خاکی خۆم و باب و باپیرانمان دەکەم، لەسەرجەم گردبوونەوەکان بۆ بەرگریکردن لە خاکەکەم بەشدار دەبم.

زانیاریی زیاتر: ساڵی 2021 بەهۆی تێکچوونی دۆخی تەندروستی مام سابیر عومەر، لەسەر فەرمانی سەرۆکوەزیران مەسرور بارزانی نەشتەرگەرییەکی گەورەی بۆ کرا.

باکگراوند: ڕۆژی 2025-02-17، کاتێک جووتیارە کوردەکانی گوندی شەناغە سەرقاڵی کێڵانی زەوییە کشتووکاڵییەکان بوون، سوپای عێراق پەلاماریدان و بەو هۆیەشەوە گرژی و ئاڵۆزی لەنێوانیان دروست بوو، ئەمەش کاردانەوەی زۆری بەدوای خۆیدا هێنا.