نەتەوە یەکگرتووەکان: زیاتر لە 90%ـی سووریاییەکان لەژێر هێڵی هەژاری دا دەژین

ئاڤا نیوز

بەگوێرەی ئامارێکی رێکخراوی نەتەوە یەکگرتووەکان؛ زیاتر لەسەدا 90ـی سووریاییەکان لەژێر هێڵی هەژاریدا دەژین کە دەکاتە نزیکەی 13 ملیۆن کەس و نزیکەی 17 ملیۆن سووریش پێویستیان بە هاوکاری مرۆڤی هەیە.

چیرۆکی سەرەکی: سەرەڕای قەیرانی سەختی دارایی و نەبوونی دەرفەتی کار، بەڵام گەڕانەوەی پەنابەرانی سووری بۆ وڵاتەکەیان لەدوای رووخانی رژێمی بەشار ئەسەد بەردەوامە، لە مانگی 12ـی ساڵی ڕابردوو لانیکەم 280 هەزار پەنابەر گەڕاونەتەوە.

ڕاگەیێندراوی فەرمی: فلیپۆ گراندی، بەرپرسی کۆمیسیۆنی باڵای کاروباری پەنابەرانی سەر بە نەتەوە یەکگرتووەکان ناسراو بە "UNHCR" رایگەیاند، لەدوای رووخانی دەسەڵاتی بەشار ئەسەد لە 2024-18-12، لانیکەم 280 هەزار پەنابەری سووریایی گەڕاونەتەوە بۆ وڵاتەکەیان، ئەمە جگە لەوەی زیاتر لە 800 هەزار ئاوارەی نێوخۆییش گەڕاونەتەوە بۆ ناوچەکانی خۆیان.

ڕاگەیێندراوەکەی نەتەوە یەکگرتووەکان سەبارەت بە دۆخی ئێستای سووریا بەتایبەت ئاوارە و پەنابەرانی دەڵێت:

٠ دەبێت هەوڵەکانی ئاوەدانکردنەوە خێراتر بکرێن، ئەگینا خەڵک جارێکی دیکە وڵاتەکە جێدەهێڵن.

٠ پێکەوە کار بکەن بۆ سەرخستنی قۆناغی راگوزەری سیاسیی لە سووریا.

٠ پشتگریی دەسەڵاتدارانی نوێی دیمەشق بکەن بۆ رووبەڕووبوونەوەی هەموو جۆرە تیرۆرێک.

باکگراوند: بەهۆی شەڕی ناوخۆی ئەو وڵاتەوە کە لە ساڵی 2011 سەریهەڵدا، زیاتر لە نیو ملیۆن کەس کوژراون و سەدان هەزاریش برینداربوونە و زیاتر لە 7 ملیۆن کەسی دیکەش ئاوارەی دەرەوەی وڵات بوون.