عەلی خامنەیی هاوکاری ماددی خانەوادەکانی حیزبوڵڵا دەکات

ئاڤا نیوز

عەلی خامنەیی، ڕێبەری باڵای ئێران بڕی  12 تا 14 هەزار دۆلار بۆ هەر خانەوادەیەک لە لوبنان و خانەوادەکانی حیزبوڵلا دەنێرێت.

وێنە گەورەکە: لەگەڵ ئەوەی وڵاتانی ئەوروپا و ئەمریکا دەسەڵاتدارانی ئێران تۆمەتبار دەکەن بە هاوکاری حیزبوڵڵا و دەڵێن ئێران دۆستی سەرەکی حیزبوڵڵایە، عەلی خامنەیی بڕیاریدا هاوکاری ماددی بنێرێت بۆ خانەوادەکانی لوبنان

ڕاگەیێنراوی فەرمی: حیزبوڵڵای لوبنان ڕایگەیاند: سندوقێکی هاوکارییەکانی ئێران لە لوبنان دانراوە کە خامنەیی بڕیاریداوە بۆ هەر خانەوادەیەکی زیانبەرکەوتووی لوبنان 12 تا 14 هەزار دۆلاریان پێبدات، هاوکات سکرتێری گشتیی نوێی حیزبوڵڵا، نەعیم قاسم ئەو هاوکارییەی بە "دیارییەک لە کۆماری ئیسلامی ئێران" وەسف کرد.

گۆشەیەکی دیکەی دیمەنەکە: حکومەتی نوێی لوبنان بە توندی چاودێری فڕۆکەخانەی بەیرووت دەکات و گەشتەکانی هێڵی ئاسمانی ماهانی هەڵوەشاندووەتەوە بەهۆی نیگەرانی لە چوونە ناوەوەی پارەی نایاسایی کۆماری ئیسلامی بۆ ناو حیزبوڵڵا.

لە لایەکی دیکەوە: بەهۆی خراپی باری ئابووری لەناو ئێراندا مەسعود پزشکیان، سەرۆککۆماری ئێران ناچار بووە یەک ملیار دۆلار لە سندووقی گەشەپێدانی نیشتمانی بە مۆڵەتی خامنەیی بکشێنێتەوە بۆ ئەوەی بتوانێت پێش نەورۆز دوو سەبەتەی خۆراک بەسەر هاووڵاتیانی دابەش بکات.