هەرێمی کوردستان هاوردەکردنی ئاژەڵ لە پارێزگاکانی عێراق قەدەغە دەکات

 

ئاڤا نیوز

بەهۆی بڵاوبوونەوەی نەخۆشی FMD لە نێو بەشێک لە گامێشەکانی هەندێک پارێزگای عێراق، هاوردەکردنی ئاژەڵ بۆ هەرێمی کوردستان قەدەغە دەکرێت.

چیرۆکی سەرەکی: ماوەی چەند ڕۆژێکە لە چەند پارێزگایەکی عێراق، گامێشەکان ڕووبەڕووی پەتایەکی ڤایرۆسی بوونەتەوە، بەهۆیەوە دەیان گامێش مردوون، حکومەتی هەرێمی کوردستانیش هاوردەکردنی ئاژەڵ لە ناوەراست و خوارووی عێراق قەدەغە دەکات.

لێدوانی فەرمی: فیراس سدیق بەڕێوەبەری سامانی ئاژەڵ لە وەزارەتی کشتوکاڵ و سەرچاوەکانی ئاو تایبەت بە ئاڤا ڕایگەیاند، بەهۆی بڵاوبوونەوەی ئەو نەخۆشیییە، هاوردەکردنی ئاژەڵ لە خواروو و ناوەڕاستی عێراق قەدەغەکرا. دڵنیایشیدا، هاوردەکردنی ئاژەڵ لە هەرێمی کوردستان زۆر توندە و بە مەرجی تەندروستی سەختدا تێدەپەڕێت، ڕێگە بە هیچ ئاژەڵێکی نەخۆش نادرێت هاوردەبکرێت.

لەبارەی ئەو نەخۆشییەوە ڕوونی کردەوە، مەترسی ئەو نەخۆشییە خێرا بڵاوبوونەوەیەتی، زیانی زۆری بۆ سامانی ئاژەڵ هەیە و بە تایبەت بێچووەکانیان وا دەکات ڕێژەی مردن لە نێویاندا بەشێوەیەکی بەرچاو زیاددەکات.