فایلی خەڵک؛ سەنتەری ڕاهێنانی قسەكردن بۆ منداڵانی نابیست لە هەولێر داوای هاوكاریی دەكات

 

ئاڤا نیوز

تەنیا تاکە سەنتەرێکی حکومی ڕاهێنانی قسەکردن بۆ منداڵانی نابیست لە هەولێر هەیە بۆ راهێنان و چارەسەرکردن، بەراورد بە زۆری ژمارەی ئەو منداڵانەی کە کێشەی بیستنیان هەیە، بەڕێوەبەری سەنتەرەکەش دەڵێت، شوێنەکەمان بچووکە و مامۆستا و ڕاهێنەریشمان کەمە.

چیرۆکی سەرەکی: لە شاری هەولێر تەنیا یەك سەنتەری حكومی هەیە بۆ ڕاهێنانی ئەو منداڵانەی كە كەمبیستن یان بە تەواوی نابیستن، بۆ ئەوەی چارەسەر بكرێن و فێری قسەكردنیش بكرێن، بەڵام ئەم سەنتەرە حكومییە كە ناوی هاوچەرخە و لەنێو بینای نەخۆشخانەی ڕزگارییە شوێنەكەی زۆر بچووكە تەنیا سێ مامۆستای دامەزراو و سێ مامۆستای خۆبەخشی هەیە و سێ ژوورە و ناتوانێت لە 40 قوتابی زیاتر وەربگرێت. ژمارەیەك لە دایك و باوكان ئەوانەی كە منداڵەكانیان نابیستن و پێویستیان بە ڕاهێنانە و پارەشیان نییە بچنە سەنتەری بە پارە.

لێدوانی فەرمی: ئاسیا بەڕێوەبەری سەنتەری ڕاهێنانی قسەكردن بۆ منداڵانی نابیست لە هەولێر بە ئاڤا میدیای ڕاگەیاند، زیاتر لە 1300 كەس ناوی نووسیوە بۆ ئەوەی سەماعەی گوێبیستبوون وەربگرێت، بەڵام ئێمە نیمانە و چاوەڕوانین لایەنی پەیوەندیدار یان خێرخوازان دابینی بكەن بۆ ئەوەی دابەشی بكەین.

گوتیشی، هەر منداڵێك پێویستی بە ڕاهێنەرێكە و ئێمە تەنیا سێ مامۆستای دامەزراو  و سێی خۆبەخشمان هەیە و هەروەها شوێنەكەشمان زۆر بچووكە، توانای وەرگرتنی ژمارەی زۆری منداڵمان نییە بۆیە دەیان دایك و باوك ناوی منداڵەكانیان نووسیوە و سەرەمان بۆ گرتوون بۆ ئەوەی كاتێك منداڵێك چارەسەر بوو شوێن بۆ منداڵی دیكە بكەینەوە.

ئەمەش بزانە: چەند جارێك سەنتەرەكە نووسراوی بەڕێوەبەرایەتیی تەندروستی هەولێر كردووە و بۆ دابینكردنی مامۆستای زیاتر و شوێنی گەورەتر، بەڵام تاوەكو ئێستا وەڵامی ئەرێنیان وەرنەگرتووە.