لەتیف ڕەشید سەرۆکایەتیی شاندی عێراق لە لوتکەی نائاسایی وڵاتانی عەرەبی دەکات

ئاڤا نیوز

 

ئامادەکارییەکان بۆ لوتکەی نائاسایی وڵاتانی عەرەبی لە قاهیرە بەردەوامن و سبەی وەزیرانی دەرەوە کۆدەبنەوە، ڕۆژی سێشەممەش سەرۆککۆماری عێراق، سەرۆکایەتی شاندی عێراق بۆ بەشداریکردن لە لوتکەکە دەکات کە تایبەتکراوە بە دۆخ و چارەنووسی کەرتی غەززە.

 

چیرۆکی سەرەکی: ڕۆژی 4ی ئازار، میسر میوانداریی کۆبوونەوەیەکی نائاسایی لوتکەی عەرەبی دەکات کە تایبەتکراوە بە پێشنیازەکەی دۆناڵد ترەمپ، سەرۆکی ئەمریکا بۆ زۆر کۆچپێکردنی خەڵکی غەززە بۆ ئوردن و میسر.

 

لێدوانی فەرمی: هیشام علوی، بریکاری وەزارەتی دەرەوەی عێراق بە ڕۆژنامەی سەباحی ڕاگەیاند، "لەتیف ڕەشید، سەرۆککۆماری عێراق سەرۆکایەتی شاندی عێراق بۆ لوتکەی نائاسایی عەرەبی دەکات، فوئاد حوسێن وەزیری دەرەوەش بەشدار دەبێت.

 

زانیاریی زیاتر: بە گوتەی هیشام علوی، عێراق پشتیووانی هەڵوێستی یەکگرتووی عەرەبی دەکات بۆ دووبارە ئاوەدانکردنەوەی غەززە و ڕاگەیاندنی ئاگربەستی هەمیشەیی، کۆچپێکردنی خەڵکی غەززەش ڕەتدەکاتەوە.