20 کۆچبەری کورد لە کەناڵی ئینگلیز ڕزگارکران

ئاڤا نیوز

 

ئەو 70 کۆچبەرەی لە کەناڵی ئینگلیز بەهۆی کون بوونی بەلەمەکەیانەوە گیریان خواردبوو، ڕزگار کران.

 

وێنە گەورەکە: 70 کۆچبەر لە چەند نەتەوەیەکی جیاواز  کە 20ـیان کوردن لە درەنگانی شەوی ڕابردوو لە بەلەمێکی چووپەوە لە فەرەنساوە بەرەو بەریتانیا بەڕێکەوتوون، لەناکاو بەلەمەکەیان کون بووە و هەواکەی کەم دەبێتەوە و ئاو دێتە ژوورەوە، بەمەش مەترسی لەسەر ژیانیان دروست بوو، بەڵام نیوەڕۆی ئەمڕۆ لەلایەن پۆلیسی فەرەنسا ڕزگارکران.

 

لێدوانی فەرمی: ڕەنج پشدەری، چالاکوانی بواری پەنابەران لە ئەوروپا بە ئاڤای ڕاگەیاند،"کۆچبەرەکان ئێستا لە فەرەنسان و دۆخی تەندروستییان باشە، تەنیا منداڵەکان بەهۆی سەرماوە نەخۆش بوون و چارەسەری پزیشکیان بۆ دەکرێت."

 

زانیاریی زیاتر: لەو ژمارە کۆچبەرە 20 ـیان کوردن و خەڵکی سنووری پارێزگای هەڵەبجە، ڕانیە و قەڵادزێن. لە نێو سەرجەمیشیاندا واتە هەموو کۆچبەرەکان 10 ژن و منداڵ هەن.

 

ئەمەش بزانە: کەناڵی ئینگلیز یەکێکە لە ڕێگا ئاوییە مەترسیدارەکان و ساڵانە هەزاران کۆچبەر لێی دەبنە قوربانی کە دەیگرنەبەر بۆ پەڕینەوە بەرەو بەریتانیا.