دەوڵەت باخچەلی سوپاسی سەڵاحەدین دەمیرتاش دەکات

 

ئاڤا نیوز

دەوڵەت باخچەلی، سەرۆکی مەهەپە پەیوەندییەکی تەلەفۆنی لەگەڵ سەڵاحەدین دەمیرتاش، سەرۆکی پێشووی هەدەپە کرد کە لە زیندانی ئەدیرنەیە و سوپاسی کرد بۆ بەشداریکردنی لە پڕۆسەی ئاشتی.

وێنە گەورەکە: عەبدوڵڵا ئۆجەلان بانگەوازی چەکدانانی لە پەکەکە کرد و داوای کرد کۆتایی بە شەڕ بهێنن و پەکەکە هەڵبوەشێنرێتەوە، ئەم بڕیارە مێژووییە کاردانەوەی جیهانیی لێکەوتەوە بە هەنگاوێکی ئاشتی گرنگ وەسف کرا. هاوکات دەوڵەت باخچەلی سەرۆکی مەهەپە ڕایگەیاند، پەیامەکەی ئۆجەلان گرنگ و بەهادارە و ئەگەر قەندیل گوێی لێبگرێت سوودی بۆ هەمووان دەبێت ئەمڕۆش پەیوەندییەکی تەلەفۆنی لەگەڵ سەڵاحەدین دەمیرتاش ئەنجامدا.

بڵاوکراوەی فەرمی: میدیاکانی تورکیا ڕایانگەیاند: لە پەیوەندییەکی تەلەفۆنیدا دەوڵەت باخچەلی سەرۆکی مەهەپە سوپاسی سەڵاحەدین دەمیرتاش، هاوسەرۆکی پێشووی هەدەپەی کرد کە بەشداری لە پڕۆسەی ئاشتیدا کردووە.

بۆچی گرنگە: ئەم بڕیارەی ئۆجەڵان بۆ هەڵوەشاندنەوەی پەکەکە پێشوازی وڵاتانی لێکەوتەوە و بە هەنگاوی گرنگی ئاشتی دادەنرێت لە مێژووی تورکیادا، دەبێتە هۆی سەقامگیربوونی سنورەکانی هەرێمی کوردستان و گوندەکانیش کە بەهۆی بوونی پەکەکەوە لەلایەن تورکیاوە بۆردومان دەکرێت

ئەمەش بزانە: سەڵاحەدین دەمیرتاش لە 4ـی تشرینی یەکەمی 2016، لەلایەن حکوومەتی تورکیاوە لەگەڵ فیگەن یوکسەکداغ و ئەندام پەرلەمانەکانی ھەدەپە بەتۆمەتی پەیوەندی لەگەڵ پەکەکە دەستگیرکران.