سەوزەکان پڕن لە ڤیتامین و خواردنیان زۆر پێویستە

ئاڤا نیوز

زانایانی زانکۆی کوینزلاندی ئوسترالیا ئاماژە بۆ ئەوە دەکەن، زۆربەی سەوزەکان ڤیتامینیان تێدایە، بەڵام ڕیشاڵی خۆراکیی کەمیان تێدایە کە بۆ کارکردنی بەکتریاکانی ڕیخۆڵە پێویستن.

ئەوەی پێویستە بیزانیت: سەوزە سەرچاوەیەکی نایابە بۆ هەردوو جۆر ڕیشاڵی تواوە و نەتواوە، ڤیتامین، کانزا و دژە ئۆکسێنەرە پێویستەکان، بەڵام هەموو سەوزەکان هەمان ڕێژەی ڕیشاڵی خۆراکییان تێدا نییە، بۆ نموونە خیار، تەماتە، سپێناخ، قارچک، بیبەر، کەلەرم و سەوزە گەڵادارەکان بەشی پێویست ماددەی ڕیشاڵی بۆ جەستە دابین ناکەن.

ئەمەش بزانە: زانایانی زانکۆی کوینزلاندی ئوسترالیا دەڵێن، دوو جۆر ڕیشاڵی خۆراکی هەیە "ڕیشاڵی تواوە و نەتواوە"، کە ئەرکی جیاوازیان هەیە.

ڕیشاڵی تواوە: کاربۆهیدراتێکی ئاڵۆز و بێ نیشاستەیە و دەتوانێت ئاو هەڵبمژێت و جیلاتینێک لە ڕیخۆڵەکاندا دروست بکات، سەرچاوەکانیشی بریتین لە میوە، سەوزە و پاقلەمەنییەکان، خواردنشیی یارمەتیی دابەزاندنی ئاستی کۆلیسترۆڵ لە خوێندا دەدات.

ڕیشاڵی نەتواوە: بارستەیەکی ڕیشاڵیی درشتە، قەبارەی پیسایی زیاد دەکات، کرداری هەرس باشتر دەکات، هەستی تێربوون درێژ دەکاتەوە و ئەگەری تووشبوون بە نەخۆشی شەکرە کەم دەکاتەوە، سەرچاوەکانی ئەم ڕیشاڵە بریتین لە گوێز، چەرەزات و بەرهەمە دانەوێڵەییەکان.

لەلایەکی دیکەوە: پسپۆڕانی خۆراک پێیان وایە کەمی ڕێژەی ڕیشاڵی خۆراکی لەم بەرهەمانەدا نابێتە هۆی نەخواردنیان، بەڵکو هاوسەنگکردنی خۆراک لەڕێگەی خواردنی بەزالیا، ئەڤۆگادۆ، گێزەر، چەوەندەر، کودوی زەرد، پەتاتە و قەیسی زۆر پێویستە.