ئاڤا بەدواداچوون بۆ پرسیارێكی زۆرێك لە خانەنشینان دەکات

ئاڤا نیوز

 

لە فایلی خەڵك، ئاڤا میدیا بەدواداچوونی بۆ پرسیاری بەشێك لە فەرمانبەران كردووە و پرسیارەكە ئەوەیە ئاخۆ ئەگەر فەرمانبەرێك بە ڕووداوێك گیان لەدەست بدات، منداڵەكانی چ ماف و ئیمتیازێكیان پێ دەدرێت؟

 

چیرۆی سەرەکی: مامۆستایەك ئافرەت لە سنووری قەزای ئاكرێ،لە مانگی11ـی ساڵی 2024 بە ڕووداوی هاتووچۆ گیانی لەدەست داوە، دوای خۆیشی سێ منداڵی جێهیشتووە کە هاوسەرگیریان نەکردووە و یەکێکیشیان خاوەن پێداویستیی تایبەتە، مامۆستاكە خزمەتی زیاتر لە 25 ساڵ بووە، كەسوكارەكەی دەپرسن ئاخۆ منداڵەكانی ئەو مامۆستایە چ ماف و ئیمتیازێكیان دەبێت؟

 

لێدوانی فەرمی: سەرچاوەیەك لە بەڕێوەبەرایەتیی خانەنشینی هەرێمی کوردستان سەبارەت ئەو كەیسە و هاوشێوەكانی ڕایگەیاند: ئەو مامۆستایە لەبەر ئەوەی لەکاتی ئەرکدا گیانی لەدەست داوە، بێ ڕەچاوکردنی بڕوانامە و ساڵانی خزمەت، بە خانەنشین هەژماردەکرێت و مووچەکەشی کە مانگانە 500 هەزار دینارە بۆ هەرسێ میراتگرەکەی خەرج دەکرێت.

 

ئەوەی پێویستە بیزانیت: نزمترین مووچەی خانەنشینانی زیندوو کراوەتە 500 هەزار، کەمترین مووچەی خانەشینی مردوو ئەوانەی میراتگریان هەیە 400 هەزار دینار وەکو بنەما جێگیر کراوە، بەمشێوەیە:

یەک میراتگر 80٪ـی مووچە وەردەگرێت، دەکاتە 320 هەزار

دوو میراتگر: 90٪ـی مووچە وەردەگرن، 360 هەزار دینار.

سێ میراتگر؛ 100٪ـی مووچە وەردەگرن کە دەکاتە 400 هەزار دینار.

هاوکات دەرماڵە 100 هەزار دینارییەکە بۆ سەرجەمیان خەرج دەکرێت، کاتێک دەستیپێکردەوە.

 

زانیاریی بەدەستهاتوو: ئەم مامۆستایە مانگی 5ـی ئەمساڵ واتە دوو مانگی دیكە، تەمەنی دەگەیشتە 60 ساڵ كە تەمەنی خانەنشینییە، بۆیە تا ئێستا نە مووچەکەی خەرج کراوە و نە خانەنشینیشی بۆ بەستراوە.

ئەمەش بزانە: پێشووتر مریەم عوسمان، بەڕێوەبەری گشتیی خانەنشینی هەرێمی کوردستان بە ئاڤای ڕاگەیاند، هەر فەرمانبەرێك كە خزمەتی لە 15 كەمتر بێت و تەمەنی خانەنشینی بێت یاخود پێش ئەوە بە ڕووداوێك گیان لەدەست بدات یاخود كۆچی دوایی بكات، ئەوا هیچ ماف و ئیمتیازێكی خانەنشینی نابێت.