وەزارەتی ناوخۆی عێراق: دۆسیەی ئەمنیی سەرجەم پارێزگاکان لە سوپا وەردەگیرێتەوە

ئاڤا نیوز

وەزارەتی ناوخۆی عێراق ڕایدەگەیێنێت، پڕۆسەی ڕادەستکردنی دۆسیەی ئەمنی ئەو چوار پارێزگایەی ماوە لە کۆتایی ئەمساڵ یاخود سەرەتای ساڵی داهاتوو ڕادەستی پۆلیسی خۆجێیی دەکرێنەوە.

 

وێنە گەورەکە: دوای تێکشکاندنی داعش و کۆنترۆڵکردنەوەی شارەکان لە لایەن سوپاوە، دۆسیەی ئەمنی کەوتە دەست سوپا، بەپێی کارنامەی کابینەی محەممەد شیاع سوودانی، سەرۆکوەزیرانی عێراق، دەبوو لە ماوەیەکی دیاریکراودا، سوپا و هێزە سەربازییەکان لەنێو شارەکان بکشێنەوە و پۆلیسی خۆجێیی لەجێگەیان دابندرێت.

 

لێدوانی ڕۆژنامەوانی: عەمید میقداد میری، وتەبێژی وەزارەتی ناوخۆی عێراق ڕایگەیاند: دۆسیەی ئەمنی چەند پارێزگایەک لە کۆتایی ساڵی 2023 ڕادەستکران، لەوانە پارێزگاکانی نەینەوا، ئەنبار، دیالە، کەربەلا. لە ماوەی ساڵی 2024یشدا، بەشێک لە ناوەندەکانی شارەکان لە پارێزگاکانی دیکە ڕادەست کران. بڕیارە تا کۆتایی ساڵی 2025 پرۆسەی ڕادەستکردنەوەکە لە هەموو پارێزگاکانی دیکەدا تەواو بێت.

 

خاڵە ئەرێنییەكان: ئامانجی پلانەکە ئەوەیە پارێزگاکان بتوانن ئاسایشی خۆیان بە شێوەیەکی سەربەخۆ بەڕێوەببەن و سەقامگیری لە سەرانسەری هەموو پارێزگاکاندا بەرزبکەنەوە. لە ماوەی ئەمساڵیشدا واتە 2025، دۆسیەی ئەمنی سەرجەم پارێزگاکان بە تەواوی ڕادەستی پۆلیسی خۆجێیی دەکرێتەوە. ئەمەش هاوکاری نێوان دەزگا ئەمنییەکانی ناوخۆ و وەزارەتی ناوخۆ لە بەرەنگاربوونەوەی تاوانەکان بەرز دەکاتەوە و گەرەنتی سەلامەتی هاووڵاتیان دەکات.

 

ئەوەی پێویستە بیزانیت: لە ساڵی 2003ـوە تاوەکو ساڵی 2017 دۆسیەی ئەمنیی کەرکووک بەدەستی پۆلیسەوە بوو، بەڵام دوای هێرشەکانی 16ـی ئۆکتۆبەری 2017 بۆ سەر شارەکە، دۆسیەکە رادەستی سوپا کرا و تاوەکو ئێستاش دۆسیەی ئەمنییان لەدەستدایە، چەندجارێکیش ئەو سوپایە لە دژی کورد لەو پارێزگاکە بەکارهێنراوە.