نەتەوەیەکگرتووەکان: ئیسرائیل لە غەززە جینۆسایدی ئەنجام داوە

ئاڤا نیوز

لێکۆڵینەوەیەکی نەتەوەیەکگرتووەکان سەبارەت بە هێرشەکانی ئیسرائیل بۆ سەر کەرتی غەززە بەو ئەنجامە گەیشتووە کە ئیسرائیل "جینۆساید"ـی ئەنجام داوە.

 

ئەوەی پێویستە بیزانیت: بەگوێرەی لێکۆڵینەوەکە کردەی ئیسرائیل بۆ وێرانکردنی سیستەماتیکییانەی ناوەندەکانی تەندروستیی کە تایبەتمەندن بە زاوزێ و وەچەخستنەوە کردەیەکی جینۆسایدە.

لێدوانی فەرمی: کۆمیسیۆنی لێکۆڵینەوەی نەتەوەیەکگرتووەکان ڕایگەیاند، ئیسرائیل "بەمەبەست هێرشی کردووەتە سەر ئەو ناوەندانە و وێرانی کردوون"، هاوکات گەمارۆی لەسەر داناون و ڕێگر بووە لە گەیشتنی یارمەتی و دەرمان بۆ ژنانی دووگیان و منداڵانی تازە لەدایکبوو.

 

ئەمەش بزانە: بەگوێرەی پەیماننامەی جینۆسایدی نەتەوەیەکگرتووەکان، جینۆساید بریتییە لەهەر کردەیەکی تاوانکاری بەمەبەستی لەناوبردنی هەموو یان بەشێک لە پێکهاتەیەکی نەتەوەیی، ڕەگەزی یان ئایینی.

 

باکگراوند: لە ڕێککەوتی حەوتی ئۆکتۆبەری ساڵی 2023 بزووتنەوەی حەماس هێرشێکی لەناکاوی کردە سەر ئیسرائیل، لەبەرامبەردا ئیسرائیل هێرشێکی فراوانی بۆ سەر کەرتی غەززە دەستپێکرد و بووە هۆی کوژرانی دەیان هەزار هاووڵاتی فەلەستینی کە بەشێکی زۆریان ژن و منداڵ بوون. دواتر و دوای 14 مانگ جەنگ و وێرانکاری، بەنێوەندگیری ژمارەیەک وڵات لە 19-1-2025 ئاگربەستی نێوان حەماس و ئیسرائیل جێبەجێکرا.