ڕوانگەی سووری: زیاتر لە 100 هەزار فەرمانبەری حكومی دەركراون

ئاڤا نیوز

 

به‌ڕێوه‌به‌ری ڕوانگه‌ی سووری بۆ مافه‌كانی مرۆڤ ئاشكرای ده‌كات، حكومه‌تی نوێی سووریا زیاتر له‌ 100 هه‌زار فه‌رمانبه‌ری له‌ دامه‌زراوه‌ فه‌رمییه‌كانى وڵات ده‌ركردووه‌ كە دەگوترێت 'بندیوارن'.

وێنە گەورەكە: لەنوێترین بڕیاریدا، حكومەتی قۆناغی ڕاگوزەری سووریا بڕیاریدا بە كۆتاییهێنان بە ڕاژەی هەزار و 580 كارمەندی هێڵی ئاسنی سووریا، هاوكات 12 هەزار فەرمانبەری كەرتەكانی تەندروستی و پەروەردەی لە پارێزگای لازقییە لە كارەكانیان دوورخستەوە.

لێدوانی فەرمی: ڕامی عەبدولرەحمان، بەڕێوەبەری ڕوانگەی سووری بۆ مافەكانی مرۆڤ لە لێدوانێكی بۆ ئاژانسی هەواڵی ئەلحورە ڕایگەیاند، سه‌رۆكی قۆناغی ڕاگوزه‌ری سووریا به‌ "كۆمه‌ڵ" فه‌رمانبه‌ران له‌ سه‌رجه‌م پارێزگاكان ده‌رده‌كات، لە چەند مانگی ڕابردوودا زیاتر لە 100 هەزار فەرمانبەری دەركردووە كە مووچەی مانگانەی زۆربەی زۆری ئەو فەرمانبەرانە لەژێر 30 دۆلاردایە.

لەلایەكی دیكەوە: پێشتر وەزیری دارایی حكومەتی نوێی سووریا ڕایگەیاندبوو، نزیكەی 400 هەزار فەرمانبەری بندیوار لە كەرتەكانی حكومەت تۆماركراون بێ ئەوەی ئەو ناوانە بە فیعلی لە وەزیفەدا بن، باسی لەوەشكرد، حكومەت پێویستیی زۆری بە كارمەند هەیە لە سەرجەم سێكتەرەكاندا.