سوودانی: پابەندین بە گەڕانەوەی ئاوارەکان بۆ شنگال

ئاڤا نیوز

 

سەرۆکوەزیرانی عێراق 14 پڕۆژەی خزمەتگوزاری بۆ شنگال و سەهلی نەینەوا (حەمدانییە، شێخان و تلكێف) ڕاگەیاند و وتی، پابەندە بە جێبەجێکردنی پڕۆژەکان بۆ خێراکردنی پرۆسەی گەڕانەوەی ئاوارەکان بۆ شنگال و سەهلی نەینەوا.

 

بۆچی گرنگە: شنگال و سەهلی نەینەوا کە قەزاکانی حەمدانییە، شێخان و تلكێف لەخۆدەگرێت، زۆربەی دانیشتووانەكەی مەسیحی، ئێزدی و توركمان، كوردی شەبەك و عەرەبن، بەهۆی کەمی خزمەتگوزاریی و دۆخی ئەمنیی تائێستا بەشێک لە ئاوارەکان بۆ ئەو ناوچانە نەگەڕاونەتەوە.

 

ڕاگەیێنراوی فەرمی: محەممەد شیاع سوودانی، سەرۆکوەزیرانی عێراق لەڕێگەی ڤیدیۆوە بەشداری لە دانانی بەردی بناغەی پڕۆژەکان کرد کە لە سندووقی شنگال و سەهلی نەینەواوە پارەیان بۆ تەرخانکراوە، ئەوەش قۆناغی یەکەمی جێبەجێکردنی پڕۆژەکانی ژێرخان و ئاوەدانکردنەوەیە لە شنگال و سەهلی نەینەوا.

 

زانیاریی زیاتر: سەرۆکوەزیران لە پەیامێکدا ئاماژەی بەوەکرد، حکومەت پابەندە بە کۆتاییهێنان بە دۆسیەی ئاوارەکان و دابینکردنی ژیانێکی شایستە بۆیان تا بۆ ناوچە ڕەسەنەکانی خۆیان بگەڕێنەوە، جەختیشیکردەوە جێبەجێکردنی پڕۆژەکان گەڕانەوەی ئاوارەکان خێراتر دەکات.