فەرەنسا: ئەوروپا هەڵەبوو لە سەپاندنی باج لەسەر کحولی ئەمریکا

 

ئاڤا نیوز

فرانسوا بایرۆ، سەرۆکوەزیرانی فەرەنسا ڕایگەیاند، یەکێتی ئەوروپا هەڵە بووە لە سەپاندنی باج لەسەر بەرهەمی کحولی ئەمریکا لە وەڵامدانەوەی باجەکانی ئەمریکادا، داواش دەکات لەسەر سەپاندنی باجەکان گفتوگۆ لەگەڵ ئەمریکا بکەن، چونکە زیان بە بەرهەمی کحولی فەرەنسا دەگەیەنێت.

چیرۆکی سەرەکی: هەفتەی ڕابردوو، دۆناڵد ترەمپ سەرۆکی ئەمریکا باجی زیادەی لەسەر هاوردەکردنی پۆڵا و ئەلەمنیۆم بۆ ئەمریکا سەپاند، ئەمەش کاردانەوەی یەکێتی ئەوروپای لێکەوتەوە و باجیان لەسەر بەرهەمی کحولی ئەمریکا سەپاند، ڕۆژی دواتر ترەمپ باجی لەسەر بەرهەمە کحولییەکانی فەرەنسا و یەکێتی ئەوروپا سەپاند.

لێدوانی فەرمی: فرانسوا بایرۆ ڕایگەیاند، ڕەنگە کۆمیسیۆنی ئەوروپا هەڵە بووبێت لە سەپاندنی سزا لەسەر بەرهەمی کحولی ئەمریکا و ئەوان خوێندنەوەیان بۆ لیستی سەپاندنی باجەکان نەکردووە.

٠ ترسمان هەیە جارێکی دیکە بەرهەمە کحولییەکانی فەرەنسا بە ئامانج بگیرێن، چونکە پێشترین بەهۆی ناکۆکییەکانی یەکێتی ئەوروپا و چین زیان بەو کەرتەی وڵاتەکە کەوتووە لەبەرامبەر سەپاندنی باج لەلایەن یەکێتی ئەوروپا لەسەر ئۆتۆمبێلە کارەباییەکانی چین.

ئەوەش بزانە: ئەمریکا گەورەترین هاوردەکاری کحولە لە جیهاندا، ساڵانە بە بەهای 4.9 ملیار دۆلار هاوردە دەکات، لەلایەکی دیکەوە هەناردەکردنی کحولی ئەمریکا لە پلەی پێنجەمی هەموو وڵاتاندایە و بەهاکەی دەگاتە نزیکەی یەک ملیار دۆلار.

باکگراوند: لە ساڵی 2018 تا 2021، کاتێک بۆ یەکەمجار باجی 25% لەلایەن یەکێتی ئەوروپاوە لە وەڵامی باجەکانی ترەمپ لەسەر پۆڵا و ئەلەمنیۆم بەرزکرایەوە، هەناردەکردنی بەرهەمی کحولی ئەمریکی بۆ یەکێتی ئەوروپا بەڕێژەی 20% دابەزیوە، لە 552 ملیۆن دۆلارەوە بۆ 440 ملیۆن دۆلار.