خانەنشینانی هەرێمی کوردستان زەوی وەردەگرن

ئاڤا نیوز

 

سەرۆکایەتی ئەنجوومەنی وەزیران ڕەزامەندی لەسەر نزیکەی 55 هەزار فۆڕمی زەوی داوە و ئەمڕۆ گەڕێنراوەتەوە وەزارەتی شارەوانی و لەوێشەوە ڕۆژانە ڕەوانەی شارەوانی پارێزگا و ئیدارە سەربەخۆکان، خانەنشین لە پرۆسەکە سوودمەند دەبن.

 

وێنە گەورەکە: لەچوارچێوەی قۆناغی سێیەمی دابەشکردنی زەوی بەرسەر فەرمانبەران و خانەنشینانی هەرێمی کوردستاندا، سەرۆکایەتی ئەنجوومەنی وەزیران ڕەزامەندیدا لەسەر ناو و فۆڕمی نزیکەی 55 هەزار کەسی دیکەدا بۆ وەرگرتنی زەوی و ئەمڕۆ فۆڕمەکان گەڕێنراوەتەوە وەزارەتی شارەوانی، و لەوێشەوە ڕەوانەی شارەوانی پارێزگا و ئیدارە سەربەخۆکان دەکرێت بۆئەوەی بەپێی زەوی بەردەست تیروپشک بۆ دابەشکردنیان بکرێت.

 

لێدوانی فەرمی: سەربەست مەولوود، سەرپەرشتیاری تیمی وردبینی و ڕێکخستنی فۆڕمی دابەشکردنی زەوی له‌ وه‌زاره‌تی شاره‌وانی بە ئاڤای ڕاگەیاند، "فۆڕمی پارێزگا و ئیدارە سەربەخۆکان جیادەکرێتەوە، هاوپێچی نووسراوی ڕێگەپێدان دەکرێت ڕۆژانە دەدرێت بەشارەوانییەکان، بۆ ئەوەی بە گوێرەی زەوی بەردەست تیروپشک بۆ دابەشکردنیان بکەن."

 

ئەمەش بزانە: بەپێی زانیارییەکانی ئاڤا میدیا، لەنێو ناوە گەڕاوەکاندا بۆ یەکەمین جار ناو و فۆڕمی نزیکەی هەشت هەزار خانەنشینانی تێدایە کە لەم پرۆسەیەی دابەشکردنی زەویدا یەکەمین جارە سوودمەند دەبن، ناوەکانی دیکەش نزیکەی 20 هەزار فەرمانبەری سەر بە وەزارەتی ناوخۆ و ئەوانی دیکەش سەر بە وەزارەتی کشتوکاڵ و چەند وەزارەت و فەرمانگەیەکی دیکەن.