پێنج بەرپرسی باڵای حەماس لە هێرشەکەی ئیسرائیلدا کوژران

ئاڤا نیوز

 

بەهۆی هێرشەکانی ئیسرائیل بۆسەر کەرتی غەززە، ژمارەیەک بەرپرسی بزووتنەوەی حەماس کوژران، لەنێویاندا دوو ئەندامی مەکتەبی سیاسی و دوو بریکاری وەزارەت و بەرپرسی ئۆپەراسیۆنەکانی وەزارەتی ناوخۆی لە غەززە تێدایە.

 

وێنە گەورەکە: درەنگانێکی شەوی رابردوو، هێزی ئاسمانی ئیسرائیل جارێکی دیکە هێرشێکی فراوانی کردەوە سەر کەرتی غەززە، بەهۆیەوە تاوەکو ئێستا زیاتر لە 330 کەس کوژراون و سەدان کەسی دیکەش برینداربوون، لەنێو کوژراوەکاندا چەند بەرپرسێکی پلە باڵای حەماس هەن.

 

زانیاری بەدەستهاتوو: سەرچاوەکانی هەواڵی نزیک لە حەماس ڕایانگەیاندووە، "لە هێرشەکەی شەوی ڕابردووی ئیسرائیلدا بۆسەر کەرتی غەززە، ژمارەیەک بەرپرسی پلە باڵای بزووتنەوەی حەماس کوژراون".

 

سەرچاوەکەی حەماس ڕایگەیاندووە دیارترین ئەو کەسانەی لە هێرشەکەدا کوژراون ئەمانەن:
- ئەبو عوبەیدە جەماسی، ئەندامی مەکتەبی سیاسیی حەماس و سەرۆکی لیژنەی فریاگوزاری
- عیسام دەعالیس، ئەندامی مەکتەبی سیاسیی حەماس و ڕاوێژکاری پێشووی ئیسماعیل هەنییە و سەرۆکوەزیرانی ئێستای غەززە

- بەهجەت حەسەن ئەبو سوڵتان، بەرپرسی ئۆپەراسیۆنەکانی وەزارەتی ناوخۆ لە غەززە
- مەحموود ئەبو وەتفا، بریکاری وەزارەتی ناوخۆی سەر بە حەماس
- ئەبو عومەر ئەلخیتی، بریكاری وەزارەتی داد لە كەرتی غەززە

 

بۆچوونی لایەنی بەرامبەر: ئیسرائیل کاتز، وەزیری بەرگری ئیسرائیل، هەڕەشەی بەردەوامیدان بە هێرشەکانیان بۆسەر کەرتی غەززە دەکات و دەڵێت: "هێرشەکانمان ناوەستێنین تا ئەو کاتەی حەماس سەرجەم بارمتەکانی ئیسرائیل ئازاد نەکات و هەموو ئامانجەکانمان لەم جەنگە بەدی نەهێنی".