دەست بەسەر کۆمپانیاکەی ئەکرەم ئیمامئۆغلودا گیرا

ئاڤا نیوز

سەرەڕای دەستگیركردنی خۆی، بە فەرمانی دادوەر دەست بەسەر كۆمپانیاكەی ئەكرەم ئیمامئۆغلو، سەرۆكی گەورە شارەوانیی ئیستەنبووڵدا گیرا.

چیرۆکی سەرەکی: بەرەبەیانی ئەمڕۆ دوای پارشێو، ئەکرەم ئیمامئۆغلو، سەرۆکی گەورە شارەوانی ئیستەنبووڵ بە تۆمەتی گەندەڵیکردن و پشتیوانیکردنی لە تیرۆر دەستگیر کرا، لە گەڵیشیدا 106 کەسی دیکە کە سەرۆک شارەوانیی شیشلی و چەند هونەرمەندێک و ئەندامانی جەهەپەی تێدایە، دەستبەسەر کران.

ڕاگەیێنراوی فەرمی: نووسینگەی داواکاری گشتیی ئیستەنبووڵ بڵاوی كردەوە، ئێوارەی ئەمڕۆ بە فەرمانی دادوەر و  لەسەر داواكاریی نووسینگەی داواکاری گشتی، کۆمپانیای هاوبەشی بازرگانی و پیشەسازیی بیناسازی ئیمامئۆغڵو کە ئەكرەم ئیمامئۆغڵو خاوەندارێتی دەكات دەستی بەسەردا گیرا.

لەلایەكی دیكەوە: لە كاردانەوەی دەستگیركردنی ئەكرەم ئیمامئۆغلو، دەم پارتی بە كودەتای ناوبرد و هەڵوەشاندنەوەی بڕوانامەكەیشی بە پەڵەیەکی ڕەشی دیموکراسیی توركیا وەسف كرد. هاوكات ڕووداوی دەستگیرکردنی ئیمامئۆغلو و ئەندامانی جەهەپە، کاردانەوەی گەورەی لێکەوتووەتەوە، دۆخی تورکیا بەتایبەت ئیستەنبووڵ بەتەواوی گرژی تێکەوتووە، بەشێکی زۆری شەقامەکانی ئیستەنبووڵ و میترۆی ئیستەنبووڵ بۆ چەند كاتژمێرێك داخران.