سەرەڕای هەڕەشەکانی ترەمپ، حووسیەکان لە هێرشەکانیان بەردەوامن

ئاڤا نیوز

 

سەرەڕای هەڕەشەکانی دۆناڵد ترەمپ، سەرۆکی ئەمریکا، حووسیەکان هێرشە مووشەکییەکانیان بۆ سەر ئیسرائیل و دەریای سوور بەردەوامە.

 

وێنە گەورەکە: چەند کاتژمێرێک دوای هەڕەشەکانی دۆناڵد ترەمپ بۆ کۆتایهێنان بە حووسیەکان، بە مووشەکی دوورمەودا فڕۆکەخانەی نێودەوڵەتیی "بن گۆریون"ـی نزیک لە تەلئەبیب لە لایەن حووسیەکانەوە کرایە ئامانج و سوپای ئیسرائیل لە بەرەبەیانی ئەمڕۆوە باری نائاسایی ڕاگەیاندووە و زەنگی ئاگادار کردنەوە لە تەلئەبیب و قودس لێدەدرێت.

 

لێدوانی فەرمی: یەحیا سەریع، وتەبێژی سەربازیی حووسیەکانی یەمەن، ئەمڕۆ پێنجشەممە ڕایگەیاند، بە مووشەکی بالیستیکی دوورهاوێژ هێرشیان کردۆتە سەر فڕۆکەخانەی نێودەوڵەتیی "بن گۆریون"ـی نزیک لە تەلئەبیب بێ گوێدانە هەڕەشەکانی دۆناڵد ترەمپ، سەرۆکی ئەمریکا، هاوکات هێرشیان کردۆتە سەر کەشتی جەنگی فڕۆکەهەڵگر و هێزی دەریایی ئەمریکا لە دەریای سوور.

 

زانیاریی زیاتر: بە گوتەی یەحیا سەریع، بەردەوام دەبن لە هێرشەکانیان بۆ سەر کەشتییە جەنگیەکانی ئەمریکا و بە ئامانجیان دەگرن.

 

ئەوەی پێویستە بیزانیت: شەوی ڕابردوو دۆناڵد ترەمپ، سەرۆکی ئەمریکا هەڕەشەی تووندی لە حووسیەکانی یەمەن کرد و گوتی: " بەردەوام دەبین لە هێرشەکانمان بۆ سەر حووسیەکان تاوەکو بە تەواوی کۆتاییان پێدەهێنین."