14 ملیار دینار بۆ 800 کامێرای چاودێریی لە نەجەف دابینکراوە، "توانای چاودێرییان نییە"

ئاڤا نیوز

لە نەجەف پارەیەکی زۆر تەرخانکراوە بۆ کڕین و دابینکردنی کامێرای چاودێری بەمەبەستی کۆنتڕۆڵکردن و کەمکردنەوەی تاوانەکان، بەڵام کامێراکان نەیانتوانیوە سنوورێک بۆ تاوانەکان دابنێن.

چیرۆکی سەرەکی: بۆ چاودێریکردن و سنووردانان بۆ ڕێژەی تاوان لە پارێزگای نەجەف، بەبەهای 14 ملیار دینار 800 کامێرای چاودێریی کڕدراوە، بەڵام ئەم کامێرایانە کۆنن و لەکاتی بەشێک لە تاوانەکانیشدا کوژێنراونەتەوە یان کاریان نەکردووە.

زانیاریی زیاتر: ئەنجوومەنی پارێزگای نەجەف لێکۆڵینەوەی لەسەر دۆسییەکە کردووە و باوەڕی وایە گومانی بوونی گەندەڵی لەسەر جۆری کامێراکان و گرێبەستەکەش هەیە.

لێدوانی فەرمی: حوسێن عیساوی، سەرۆکی ئەنجوومەنی پارێزگای نەجەف دەڵێت، لەسەر ئەو بابەتە میوانداریی فەرماندەی پۆلیسی پارێزگاکەیان کردووە و بۆیان دەرکەوتووە کاری کامێراکان خراپە و کوالێتیشیان کۆنە.

بەشێک لە هاووڵاتیانی نەجەفیش باس لەوە دەکەن بوونی ئەو ژمارە زۆرەی کامێرای چاودێریی نەبووەتە هۆی کەمبوونەوەی تاوان، چونکە لەکاتی بەشێک لە تاوانەکان کامێراکان کوژێنراونەتەوە یان کاریان نەکردووە، بەوهۆیەش کامێراکان نەیانتوانیوە سنوورێک بۆ تاوانەکان دابنێن.