ئیمامئۆغلو سەرجەم تۆمەتەکان کە دراوەتە پاڵی ڕەتدەکاتەوە

ئاڤا نیوز

دووەم لێکۆڵینەوە لە دژی ئەکرەم ئیمامئۆغلو، سەرۆکی گەورە شارەوانی ئیستەنبووڵ لە چوارچێوەی "هاوکاریکردنی پەکەکە" لەلایەن داواکاری گشتی ئیستەنبووڵەوە، دەستیپێکرد، لێکۆڵینەوەکە ماوەی 5 کاتژمێری خایاند، ئیمامئۆغلو سەرجەم ئەو تۆمەتەکانی کە ئاڕاستەی کرابوون، ڕەت کردەوە.

بۆچی گرنگە: لێکۆلینەوەکە لە چوارچێوەی تۆمەتبارکردنی ئیمامئۆغلو بوو بە "هاوکاریکردنی پەکەکە"، دوێنی لە چوارچێوەی 'لێکۆڵینەوە لە گەندەڵی' ئیفادەی لێ وەرگیرا، بەڵام ئیمامئۆغلو سەرجەم تۆمەتەکانی ڕەتکردووەتەوە و بەشێکی پرسیارەکانی وەڵام نەداوەتەوە.

ئەوەی لە بارەیەوە دەگوترێت: بەشێک لە میدیاکانی تورکیا باس لەوە دەکەن کە ئیمامئۆغلو 100 ملیۆن لیرەی تورکی بە خێزانەکانی پەکەکە داوە بۆ ئەوەی دەنگی پێبدەن لەهەڵبژاردنەکانی  ئاداری ساڵی ڕابردوو".

زانیاری بەدەستهاتوو: لە چوارچێوەی لێکۆڵینەوەکانی گەندەڵی لە تەندەرەکانی ڕیکلامدا پرسیار لە ئەکرەم ئیمامئۆغڵو کرا کە بڕی 16 ملیار لیرەی لە پارەی حکومەت بۆ ڕێکلام خەرجکردووە. لە وەڵامدا گوتی: من هیچ پەیوەندییەکم بەو پرسیارەوە نییە، بە تووندی ڕەتی دەکەمەوە.

لە لایەکی دیکەوە: بە بڕیاری وەزارەتی ناوخۆی تورکیا، نزیکەی 350 خۆپیشاندەر لە ئیستەنبووڵ و ئەنقەرە و 6 شاری دیکەی تورکیا بە تۆمەتی"دروستکردنی گێرەشێوێنی و زیانگەیاندن بە دام و دەزگاکانی دەوڵەت" دەستگیرکران.

هەنگاوی داهاتوو: بڕیارە ئیمامئۆغڵو دوای تەواوبوونی وەرگرتنی ئیفادەکەی، ئەمڕۆ ئێوارە ڕەوانەی داواکاری گشتی بکرێت، دوێنێ سەرۆکایەتی داواکاری گشتی ئیستەنبووڵ ڕایگەیاندبوو کە ئیمامئۆغڵو کاتژمێر 9ـی ئەمشەو لە داواکاری گشتی ئامادە دەبێت.