حووسییەکان مووشەک ئاراستەی ئیسرائیل دەکەن

 

ئاڤا نیوز

سوپای ئیسرائیل ڕایگەیاند، مووشەکێک لە یەمەنەوە ئاراستەی وڵاتەکە کراوە، بەڵام بە سیستمی بەرگری ئاسمانی خراوەتە خوارەوە.

چیرۆکی سەرەکی: ڕۆژی 2025-03-23، حووسییەکانی یەمەن مووشەکێکیان ئاراستەی ئیسرائیل کرد، بەڵام لەلایەن سیستمی بەرگری ئاسمانی ئیسرائیل مووشەکەکە خرایە خوارەوە و هیچ زیانێکی گیانی  وماددی نەبوو.

ڕاگەیێنراوی فەرمی: سوپای ئیسرائیل ڕایگەیاند: ''بەهۆی مەترسی هێرشی ئاسمانی زەنگی ئاگادارکەرەوەمان لە قودس و چەند ناوچەیەکی ئیسرائیل لێدا دوای ئەوەی مووشەکێکمان خستە خوارەوە کە لە یەمەنەوە ئاراستەی ئیسرائیل کرابوو''.

لە لایەکی دیکەوە:  یەحیا سەریع ، وتەبێژی حووسییەکان ڕایگەیاند، ''حووسییەکان دوو ئۆپەراسیۆنی سەربازییان ئەنجامداوە، فڕۆکەخانەی بن گوریۆن لە یافا بە مووشەکی ''فەڵەستین 2'' و ژمارەیەک کەشتی جەنگی سەر بە کەشتی فڕۆکە هەڵگری 'یو ئێس ئێس هاری ترومان' لە دەریای سوور بە فڕۆکەی بێفڕۆکەوان کراونەتە ئامانج".

زانیاری زیاتر: دوای دەستپێکردنەوەی هێرشەکانی ئیسرائیل بۆ سەر کەرتی غەززە لە هەفتەی ڕابردوو، حووسییەکانی یەمەن وەک پشتتیوانییەک بۆ کەرتی غەززە هێرشەکانی بۆ سەر ئیسرائیل و کەشتییە بازرگانییەکانی ئەو وڵاتە و ئیسرائیل دەستپێکردەوە.