وەزیری نەوتی عێراق: هەرێمی كوردستان ڕۆژانە 286 هەزار بەرمیل نەوت بەرهەم دەهێنێت

ئاڤا نیوز

 

وەزیری نەوتی عێراق ڕایدەگەیەنێت، ئێستا ئاستی بەرهەمهێنانی نەوت لە هەرێمی کوردستان، ڕۆژانە 286 هەزار بەرمیلە، ڕوونیشی کردەوە شەفافییەتی دۆسیەی هەناردەکردنی نەوت لە تێکڕای عێراق، لەئاستێکی بەرزدایە.

 

وێنە گەورەکە: عەیان عەبدولغەنی، وەزیری نەوتی عێراق، لە دیدارێکی تەلەفزیۆنی لەگەڵ کەناڵی هەواڵی ئەلعێراقییە، وەڵامی ژمارەیەک پرسیاری پەیوەست بە دۆسیەی نەوت و گازی عێراق دایەوە و دواپێشهاتەکانی سێکتەری نەوت و گازی باس کرد.

 

لێدوانی فەرمی: وەزیری نەوتی عێراق رایگەیاند، ئۆپێک پێی ڕاگەیاندووین کە ئێستا هەرێمی کوردستان ڕۆژانە 286 هەزار بەرمیل نەوت بەرهەم دەهێنێت.

 

بۆچی گرنگە: ئەو لێدوانەی وەزیری نەوتی عێراق لەکاتێکدایە، هەنگاوەکانی هەناردەکردنەوەی نەوتی هەرێمی کوردستان خێراتر بووە و تەنیا چەند بەربەستێکی تەکنیکی ماون، پێشتر هەرێمی کوردستان ڕایگەیاندبوو، دەتوانن بڕی 118 هەزار بەرمیل نەوت لە ڕۆژێکدا هەناردە بکەن و ئەوەی تر بۆ پێداویستی ناوخۆیی بەکاربهێنن.

 

زانیاریی زیاتر: شەفافییەتێکی زۆر لەهەناردەکردنی نەوتی عێراق هەیە؛ ئەو تانکەرانەی نەوتی فرۆشراو دەگوازنەوە لە رێگەی مانگی دەستکرد چاودێری دەکرێن و دەبێت هەموو گرێبەستەکان دیاری بکرێن و شوێنی کۆتایی هەناردەکردنی نەوت بزاندرێت، ئەوەش بەوتەی وەزیری نەوتی عێراق.

 

لەلایەکی دیکەوە: عەیان عەبدولغەنی ئاماژەی بەوەشکرد کە کەشتییە نەوتهەڵگرەکانی ئێران بۆ خۆدزینەوە لە سزاکان، بەڵگەنامە ساختەکانی عێراقیان بەکارهێناوە و "ئێمە لایەنی ئەمریکیمان ئاگادار کردەوە کە ئەم بەڵگەنامانە ساختەن و هیچ پەیوەندییەکمان پێوە نییە".