وڵاتێکی ئەفریقی سەرۆك و جێگر و زۆربەی وەزیرانی ئافرەتن

ئاڤا نیوز

وڵاتێكی كیشوەری ئەفریقا زۆرترین پۆستە سیادییەكان لەلایەن ئافرەتانەوە بەڕێوەدەبردرێت و لەڕووی ڕێژەی خانمان لە دەسەڵات، لەسەر ئاستی جیهان وێنەی نییە.

چیرۆكی سەرەكی: ئەمڕۆ دووشەممە نتۆمبۆ ناندی ندایوا، وەك سەرۆككۆماری وڵاتی نامیبیا دەستبەكاربوو كە خۆی و جێگرەكەی لوسیا ڤیتبۆی، ئافرەتن و لە شاری ویندهۆكی پایتەختی ئەو وڵاتە سوێندی یاسایی خوارد.

ئەوەی پێویستە بیزانیت: نامیبیا وەك تاكە وڵاتی جیهان لەكۆی 14 وەزارەت، هەشت وەزیری خانمی هەیە، ئەوە جگە لەوەی سەرۆككۆمار و جێگرەكەی ئافرەتن، واتە ڕێژەی بەشداریی ئافرەت لە دەسەڵات 62%ـە. هاوكات تاكه وڵاتی ئەفریقایە كە سەرۆك و جێگرەكەی ئافرەتن.