هاتووچۆی هەولێر: كامێرای خاڵ بۆ خاڵ ئامانجی خۆی پێكاوە

ئاڤا نیوز

گوتەبێژی پۆلیسی هاتووچۆی هەولێر ئاشكرای دەكات، كامێراكانی خاڵ بۆ خاڵ و تۆماركردنی تیژڕۆیی ئامانجی خۆیان پێكاوە و بەڕێوەبەرێكی هاتووچۆی سلێمانیش دەڵێت، ئەو كامێرایانە 100% كاریگەرییان بۆ كەمكردنەوەی ڕووداوەكانی هاتووچۆ هەبووە.

وێنە گەورەكە: هەرچەندە لە ساڵی 2012ەوە كامێرای تۆماركردنی تیژڕۆیی لەلایەن پۆلیسی هاتووچۆی هەرێمی كوردستانەوە بۆ كەمكردنەوەی ڕووداوەكانی هاتووچۆ كاری پێدەكرێت، بەڵام دوو ساڵە دەست كراوە بە دانانی كامێرای خاڵ بۆ خاڵ لە شەقامە خێراكان ئەمەش لەپێناو سەلامەتیی زیاتری گیانی شۆفێر و سەرنشینانی ئۆتۆمبێل.

لێدوانی فەرمی: عەقید هێمن ئەمین، گوتەبیژی هاتووچۆی هەولێر بە ئاڤا میدیای ڕاگەیاند: دانانی كامێراكانی تۆماركردنی تیژڕۆیی و خاڵ بۆ خاڵ كاریگەریی ڕاستەوخۆیان لەسەر كەمكردنەوەی ژمارەی ڕووداوەكانی هاتووچۆ هەبووە، ئەمەش بەپێی بەراوردی ئامارەكان لە پێش دانانی كامێراكان و دوای دانانیان، بۆ ئەمەش نەخۆشخانەكانی فریاكەوتن لە هەرێمی كوردستان گەواهیدەرن و داتاكانیان بەڵگەن بۆ ئەو كەمبوونەوەیەی ڕووداوەكانی هاتووچۆ.

لەلایەكی دیكەوە: عەمید سەعدوڵڵا، بەڕێوەبەری كامێراكانی هاتووچۆ لە هاتووچۆی سلێمانی بە ئاڤا میدیای ڕاگەیاند: مردن بە ڕووداوەكانی هاتووچۆ لەدوای خستنەكاری كامێراكانی خاڵ بۆ خاڵ بە ڕێژەی لە 100% كەمی كردووەتەوە.

ئەوەی پێویستە بیزانیت: بەپێی ئامار و داتاكانی بەڕێوەبەرایەتییەكانی هاتووچۆ لە شارەكانی هەرێمی كوردستان، تۆماركردنی ڕووداوەكانی هاتووچۆ لە نزیك كامێراكانی خاڵ بۆ خاڵ و تیژڕۆیی نزیكن لە سفر.