وەزیری دەرەوەی فەرەنسا: ڕووبەڕووبوونەوەی سەربازی لەگەڵ ئێران ڕوودەدات ئەگەر گفتوگۆ ڕەت بکاتەوە

ئاڤا نیوز

 

فەڕەنسا هەڕەشە لە ئێران دەکات و دەڵێت، ئەگەر ئەو وڵاتە دانوستاندن لەسەر بەرنامە ئەتۆمییەکەی نەکات: ڕووبەڕووبوونەوەی سەربازی ڕوودەدات.

 

وێنە گەورەکە: وڵاتانی ڕۆژئاوا و ئەمریکا و ئیسرائیل نیگەرانن لە هەوڵەکانی ئێران بۆ پەرەپێدانی بەرنامە ئەتۆمییەکەی و بە مەترسی بۆ سەر بەرژەوەندییەکانیان دەزانن، بەڵام تاران ئەم تۆمەتانە ڕەتدەکاتەوە و دەڵێت، بەرنامە ئەتۆمییەکەی تەنیا بۆ دابینکردنی وزەیە.

 

لێدوانی فەرمی: ژان نۆیەل بارۆ، وەزیری دەرەوەی فەرنسا لە بەردەم پەرلەمانی وڵاتەکەی ڕایگەیاند، نابێت هەرگیز ئێران ببێتە خاوەنی چەکی ئەتۆمی و ئەگەر ئێران دانوستاندن لەسەر بەرنامە ئەتۆمییەکەی نەکات: ڕووبەڕووبوونەوەی سەربازی ڕوودەدات.

زانیاریی زیاتر: ڕوونیشیکردەوە، کاری لە پێشینەیان گەیشتن بە ڕێککەوتنێکە لەگەڵ ئێران کە بۆ هەمیشە بەرنامە ئەتۆمییەکەی ئێران سنووردار بکات و تەنیا چەند مانگێکیان ماوە بۆ کۆتایی هاتنی ڕێککەوتنی ساڵی 2015.

 

باکگراوند: لە ساڵی 2015 ئێران و وڵاتانی زلهێز (چین، ڕووسیا، ئەمریکا، فەرەنسا و بەریتانیا و ئەڵمانیا) ڕێککەوتنێکیان بۆ هەڵگرتنی ژمارەیەک سزا لە بەرامبەر سنووردارکردنی بەرنامە ئەتۆمییەکەی ئێران لەگەڵ تاران ئەنجامدا، بەڵام لە ساڵی 2018 بە بڕیاری دۆناڵد ترەمپ، ئەمریکا لە ڕێککەوتنەکە کشایەوە و سزای بەسەر ئێران سەپاند.