وەزارەتی ناوخۆ: كامێراكانی تۆماركردنی تیژڕۆیی لە هەموو كوردستان دادەنرێن

ئاڤا نیوز

وەزارەتی ناوخۆی حكومەتی هەرێمی كوردستان جەخت دەكاتەوە كە هەڵمەتی دانانی كامێرای تیژڕۆیی لە شەقامەكان بەردەوام دەبێت و سەرتاسەری هەرێمی كوردستان دەگرێتەوە.

وێنە گەورەكە: وەزارەتی ناوخۆ، لە ڕێگەی بەڕێوەبەرایەتییەكانی هاتووچۆ بەردەوامە لە هەڵمەتی دانانی كامێرای تیژڕۆیی لە شەقامەكانی نێو شارەكانی و شەقامە خێرا و دەرەكییەكان، چەندین جار وەزارەتەكە دووپاتی كردووەتەوە كە كامێراكان كاریگەریی ڕاستەوخۆیان بۆ كەمكردنەوەی ڕووداوەكانی هاتووچۆ و قوربانییەكان هەبووە.

ڕاگەیێنراوی فەرمی: وەزارەتی ناوخۆی حكومەتی هەرێمی كوردستان ڕایگەیاند: كامێراكانی تۆماركردنی تیژڕۆیی دەستكەوتێكی گرنگیان هەبووە ئەویش بریتییە لە كەمبوونەوەی ڕووداوەكانی هاتووچۆ و كەمبوونەوەی قوربانییەكان، پابەند دەبین بە دامەزراندنی كامێراكان لە سەرتاسەری هەرێمی كوردستان و پرۆسەكە لە شار و شارۆچكەكان بەردەوامە.

زانیاریی زیاتر: وەزارەتی ناوخۆ جەخت لە ئەوەش دەكاتەوە كە لێپرسینەوەی یاسایی لەگەڵ هەموو ئەو شۆفێرانە دەكرێت كە پابەندی پاراستنی مافەكانی بەكارهێنەرانی شەقام نابن و دەبێت هەموو شۆفێرێك پابەند بێت بە یاسا و ڕێنماییەكانی هاتووچۆ و سەلامەتیی رێگاوبان.