دوای 13 ساڵ ئەردۆغان لەگەڵ شاندی دەم پارتی کۆبووەوە

ئاڤا نیوز

دوای زیاتر لە 13 ساڵ بۆیەکەمجار ڕەجەب تەیب ئەردۆغان، لەگەڵ شاندی دەم پارتی بۆماوەی کاتژمێرێک و 25 خوولەک کۆبووەوە.

 

بۆچی گرنگە: شاندی دەم پارتی لەماوەی ڕابردوودا بە ئامانجی گەیاندنی پەیامی ئاشتی لەگەڵ زۆرینەی لایەنەکانی تورکیا و هەرێمی کوردستانیش کۆبوونەتەوە، ئێستاش دوای 13 ساڵ بۆیەکەمجار لەگەڵ سەرۆککۆماری تورکیا کۆبوونەوە تاوەکو داواکاری و پێشنیارەکانی پڕۆسەی ئاشتی پێبگەیەنن. 

 

ڕاگەیێنراویی فەرمی: سڕی سورەیا ئۆندەر لەدوای کۆبوونەوەیان لەگەڵ ئەدۆغان ڕایگەیاند، کۆبوونەوەمان زۆر ئەرێنی بووە و زۆر زیاتر ئومێدمان بە داهاتووی پڕۆسەکە هەیە، پەروین بوڵدانیش گوتی: پڕۆسەکە زۆر ئەرێنی و باش دەبێت. 

 

زانیاریی زیاتر: شاندی دەم پارتی کە لە سڕی سورەیا ئۆندەر و پەروین بۆڵدان، پەرلەمانتاری دەم پارتی پێکهاتبوون، لە کۆشکی کۆماری لەلایەن ڕەجەب تەیب ئەردۆغان، ئاکیف ئالا، بریکاری سەرۆکی ئاکپارتی و ئیبراهیم کاڵن، سەرۆکی دەزگای میت  پێشوازیان لێکرا.

 
باکگراوند: دوایین جار ئەردۆغان لە 12ی حوزەیرانی 2012 لە نووسینگەی سەرۆکوەزیران لەگەڵ سەڵاحەددین دەمیرتاش و گولتان کشاناک کۆبووەوە.