مێتا 90 هەزار بڵاوکراوە لە فەیسبووک و ئینیستاگرام لەسەر داوای ئیسرائیل دەسڕێتەوە

ئاڤا نیوز

 

ماڵپەری 'درۆپ سایت' بە پشتبەستن بە زانیارییەکانی کۆمپانیای مێتا  بڵاویکردەوە، ئیسرائیل بەردەوام داوا  لە مێتا دەکات بڵاوکراوەکانی دژ بە "بەرژەوندییەکانی ئەوان" بسڕێتەوە.

 

زانیاریی بەدەستهاتوو: ماڵپەری 'درۆپ سایت' لە زاری چەند سەرچاوەیەکی کۆمپانیای مێتا  بڵاویکردەوە، ئیسرائیل داوای لەو کۆمپانیایە کردووە بڵاوکراوەکانی لایەنگرانی فەڵەستین  دژی بەرژەوەندییەکانی [ ئیسرائیل] لە فەیسبووک و ئینستاگرام بسڕێتەوە.

 

ئەوەی پێویستە بیزانیت: ماڵپەرەکە ئەوەشی ئاشکرا کراوە، کۆمپانیای مێتا لە سەرەتای دەستپێکردنی هێرشەکانی ئیسرائیل بۆ سەر کەرتی غەززە، ڕەزامەندی %94  داواکارییەکانی تەلئەڤیڤی داوەتەوە و زیاتر لە 90 هەزار بڵاوکراوەی سڕیوەتەوە.

 

هۆکارە زانراوەکان: ئیسرائیل بەبیانووی هاندانی "تیرۆر و توندوتیژی" دژی وڵاتەکەی لەلایەن فەڵەستین و هەندێک وڵاتی دیکەی ئیسلامی،  داوای کردووە بڵاوکراوەکان لە فەیسبووک و ئینستاگرام بسڕێنەوە.

 
لەلایەکی دیکەوە: ڕاپۆرتە نوێیەکەی  (DropSite) دوای چەند ڕۆژێک دێت لە ڕاپۆرتێکی ماڵپەڕی  (Grayzone) ئەمریکی کە ئاشکرایکردووە زیاتر لە 100 کارمەند و سەربازی پێشووی ئیسرائیل لە کۆمپانیای Meta کاردەکەن، هاوکات ڕاپۆرتەکان ئاشکرای دەکەن بوونی کارمەندی ئیسرائیلی لە ناو کۆمپانیا تەکنەلۆژیا گەورەکانی وەک، گووگڵ ئاماژەیە بۆ باڵادەستی لایەنگریی ئیسرائیل لەناو حکومەتی ئەمریکادا.

 

ئەوەی لەبارەیەوە دەگوترێت: ساڵانێکە کۆمپانیای مێتا بە لایەنگری بۆ ئیسرائیل تۆمەتبار دەکرێت و هەژماری لایەنگرانی فەلەستینی دادەخات و بڵاوکراوە و وێنەکانی دژی بەرژوەندییەکانی ئیسرائیل دەسڕێتەوە.