بەرپرسێکی باڵای داعش و چوار چەکداری دیکە کوژران

ئاڤا نیوز

 

لە هێرشێکی ئاسمانیدا بۆ سەر چەند حەشارگەیەکی چەکدارانی داعش لە چوارچێوەی کەرتی ئۆپەراسیۆنەکانی سەڵاحەددین، بەرپرسێکی باڵای داعش و چوار چەکداری دیکە کوژران.

 

چیرۆکی سەرەکی: یەکشەممە 13ـی نیسان شانەی ئەمنی عێراق ڕایگەیاند، هێزی ئاسمانیی عێراق لە ڕێگەی فڕۆکەی جەنگی  F-16ـەوە  دوو حەشارگەی چەکدارانی داعشیان لە دوورگەی ئەلبو مەرمووس، لە چوارچێوەی کەرتی فەرماندەیی ئۆپەراسیۆنەکانی سەڵاحەددین کردە ئامانج و بەهۆیەوە ژمارەیەک چەکداری داعش کوژران.

 

زانیاریی بەدەستهاتوو: دووشەممە 14ـی نیسان، سەرچاوەیەکی ئەمنی کە قسەی بۆ میدیای عێراق کردووە، ئاماژە بۆ ئەوە کردووە لە ئەنجامی ئەو هێرشە "معاونی ئەمنی" سەر بە ویلایەتی سەڵاحەددینی ڕێکخراوی تیرۆریستی داعش لە قەزاری دۆر لە پارێزگای سەڵاحەددین کوژراوە.

 

زانیاریی زیاتر: هەر بەگوێری ئەو زانیاریانەی سەرچاوەکەی ئاشکرای کردووە، جگە لەو بەرپرسەی داعش، چوار بۆ پێنج ئەندامی دیکە ڕێکخراوەکە لە هێرشەکەدا کوژراون.

 

باکگراوند: لە ساڵی 2017ـەوە شکستی داعشی لە عێراق ڕاگەیێنراوە، بەڵام شانە نوستووەکانی ئەو ڕێکخراوە لە پارێزگاکانی عێراق چالاکن و ناوە ناوە هێزە ئەمنییەکان دەکەنە ئامانج و لە بەرامبەریشدا ئۆپەراسیۆنە ئەمنییەکان بۆ دەستگیرکردن و ڕاوەدوونیان لەلایەن هێزەکانی هاوپەیمانان و هێزەکانی پێشمەرگە و هێزە عێراقییەکان بەردەوامە.