ئێران شوێنی بەڕێوەچوونی خولی دووەمی دانوستانەکان لەگەڵ ئەمریکا ئاشکرا دەکات

ئاڤا نیوز

ئێوارەی ئەمڕۆ دووشەممە، وەزارەتی دەرەوەی ئێران ڕایگەیاند، خولی دووەمی دانوستانەکانی نێوان ئێران و ئەمریکا ڕۆژی شەممە لە شاری مەسقەت بەڕێوە دەچێت.

وێنە گەورەکە: دوای ئەوەی ڕۆژی شەممە 12-4-2025، یەکەم خولی دانوستانی ناڕاستەوخۆ لە نێوان ئەمریکا و ئێران لە شاری مەسقەت لە عومان بەڕێوەچوو،  هەردوو لایەن جەختیان لەوە کردەوە دانوستانەکانیان ئەرێنی بوون و بڕیارە دووەم خولی دانوستانەکان هەفتەی داهاتوو ئەنجام بدەن.

لێدوانی فەرمی: ئیسماعیل بەقائی، وتەبێژی وەزارەتی دەرەوەی ئێران ڕایگەیاند: "دوای ڕاوێژکردن  بڕیاردرا 19ـی نیسان خولی دووەمی دانوستانەکان لە پایتەختی عومان بەڕێوەبچێت".

- ئەم لێدوانەی بەقائی لە کاتێکدایە، کە وەزیری دەرەوەی ئیتاڵیا ڕایگەیاندبوو، دووەم خولی دانوستانەکان لە ڕۆمای پایتەختی ئیتاڵیا بەڕێوەدەچێت.

 

لەلایەکی دیکەوە: دوێنێ ئێوارە لە سەروبەندی بەڕێوەچوونی دانوستانەکانی نێوان ئێران و ئەمریکا، دۆناڵد ترەمپ ڕایگەیاند، دەبێت ئێران دەستبەرداری خەونی خاوەنداریێتی بەرنامەی ئەتۆمی بێت.