فایلی خەڵک؛ دەرچووانی کۆلێژە پزیشکییەکان چاوەڕێی بڕیارێکی سوودانی دەکەن

ئاڤا نیوز

نزیکەی 780 دەرچووی کۆلێژە پزیشکییەکان و چاوەڕێی دامەزراندن دەکەن. وەزیری تەندروستیش ڕایدەگەیێنێت، "ناوی دەرچووانمان پێشکەشی حکومەتی عێراق کردووە".

وێنە گەورەکە: دەرچووی کۆلێژە پزیشکییەکان ئەوانەی لە ناوەوەی کوردستان تەواویان کردووە و ئەوانەشی لە دەرەوە لەژێر ڕێنماییەکان بڕوانامەیان هێناوەتەوە، ژمارەیان 780 کەسە و چاوەڕێی دامەزراندن دەکەن.

ئەوەی پێویستە بیزانیت: ماوەی چەند ساڵێکە بەهۆی بڕینی بودجە و پێنەدانی ژمارەی وەزیفی بە وەزارەتەکانی حکومەتی هەرێمی کوردستان دامەزراندن وەستاوە، ئێستا بۆ دەرچووانی کۆلێژە پزیشكییەکان داوای کردنەوەی سیستەمەکە و پێدانی ژمارەی وەزیفی دەکەن، خشتەی بودجە پەسەند کراوە و بۆ گۆڕانکاری دەبێت خشتەکە هەموار بکرێتەوە.

لێدوانی فەرمی: د. سامان بەرزنجی، وەزیری تەندروستی حکومەتی هەرێمی کوردستان بۆ ئاڤا دەڵێت، ناوەکانیان ناردووە بۆ بەغدا و لەگەڵ نوێنەرایەتیی حکومەتی هەرێمی کوردستان هەماهەنگییان هەیە، بۆ ئەوەی یاسای پلەبەندی پزیشکی دامەزراندن بۆ سیستەمی تەندروستی بگەڕێتەوە و نمرەی وەزیفییان پێبدەن.

- تەنانەت داوای دیداری محەممەد شیاع سوودانی، سەرۆکوەزیرانی عێراقیان کردووە بۆ ئەو مەبەستە ئەگەر پێویست بکات.