هەوڵێکی کودەتا لە سووریا شکست پێدەهێنرێت

ئاڤا نیوز

وەزیری ناوخۆی سووریا ئاشکرای کرد، حکومەتی وڵاتەکەی شکستی بە کودەتایەکی سەربازی هێنا کە لەلایەن لایەنگرانی ڕژێمی بەشار ئەسەدەوە ئامادەکرابوو.

چیرۆکی سەرەکی: ماوەی چەند ڕۆژێکە لە شارۆچکەی "بوسرەشام" لەلادێکانی دەرعا گرژیی و ئاڵۆزیی لەنێوان کۆمەڵێک ئەفسەری ڕژێمی پێشووی بەشار ئەسەد و هێزە ئەمنییەکانی سووریا دروستبووە، بە گوێرەی ئاژانسی هەواڵی فەرمی سووریا، هێزەکانی وەزارەتی ناوخۆ بەڕێککەوتن لەگەڵ کەسایەتیی ناوچەکە کۆتاییان بەگرژییەکان هێناوە.

لێدوانی فەرمی: ئەنەس خەتاب، وەزیری ناوخۆی سووریا ڕایگەیاند: بە هەماهەنگی نێوان هەردوو وەزارەتی ناوخۆ و بەرگریی سووریا تواندرا لەماوەیەکی کورتدا شکست بە  کودەتایەکی سەربازی دژ بە وڵات و میللەت بهێنرێت کە لەلایەن چەند ئەفسەرێکی ڕژێمی بەشار ئەسەدەوە ئامادەکرابوو.

- ئاماژەی بەوەش کرد، ڕاوەدوونانی ئەو کەسانەی لە دەرەوەی یاسا کار دەکەن دەستیپێکردووە، لەداهاتووشدا شکست بەهەموو جۆرە ئاژاوەگێڕییەک دەهێنن.

ئەوەی پێویستە بیزانیت: بوسرە شام دەکەوێتە پارێزگای دەرعا و 140 کێلۆمەتر لەدیمەشقی پایتەختەوە دوورە، بە دەسپێکی سەرهەڵدانی ناڕەزایەتییە جەماوەرییەکانی بەهاری ساڵی 2011 ـی دژی ڕژێمی بەشار ئەسەد دادەنرێت.