ئاڤا گوتار و ڤیدیۆیەكی بڵاونەكراوەی سەرۆك بارزانی بڵاو دەكاتەوە

ئاڤا نیوز

ئاڤا میدیا بۆ یەكەمجار ڤیدیۆیەكی مێژوویی سەرۆك بارزانی بڵاو دەكاتەوە كە لە ساڵی 1994 تۆمار كراوە و ئەوكات لە ساڵیادی كیمیاییبارانكردنی دۆڵی بالیسان گوتارێكی بۆ خەڵكی دەڤەرەكە پێشكەش كردووە.

وێنە گەورەكە: ئەمڕۆ 16-4-2025، ساڵیادی كیمیاییبارانكردنی دەڤەری بالیسان و شێخوەسانانە لەلایەن ڕژێمی بەعسی ڕووخاوەوە كە بەو هۆیەوە 263 شەهید و 800 كەسی دیكەش بریندار بوون، ئاڤا میدیا بۆ یەكەم جار، ڤیدیۆیەكی بڵاونەكراوەی سەرۆك بارزانی بڵاو دەكاتەوە، ڤیدیۆیەكە لەلایەن بنەماڵەی ئەنوەر بەگی بێتواتەوە چەندین ساڵە پارێزراوە و  تایبەت بۆ ئاڤا میدیا نێردراوە.

قووڵتر: ڤیدیۆیەكە هی ساڵی 1994ەو ئەوكات سەرۆك بارزان لە ساڵیادی كیمیاییبارانكردنی دەڤەری بالیسان و شێخوەسانان، چووەتە گوندی شێخ وەسانان و گوتارێكی مێژوویی پێشكەش كردووە.

به‌ڵگه‌: سەرۆك بارزانی لە پەیامەكەیدا دەڵێ: بۆ من شانازییەكی گەورەیە كە ئەمڕۆ لەم شوێنە پیرۆزە، لە مەڵبەندی شۆڕش و  خەبات و فیداكاری، لەگەڵتان كۆببمەوە بۆ یادكردنەوەی ئەو شەهیدە قارەمانانەی حەوت ساڵ پێش ئێستا گیانی خۆیان بەخت كرد بۆ كورد و كوردستان و بووە هۆی ئەم ئازادییەی كە ئەمڕۆ شانازیی پێوە دەكەین.

- میللەتی كورد، میللەتێكی زیندووە و  نەمرە، نە كیمیاباران و نە تەعریب و نە هیچ ڕەفتارێكی دیكەی فاشیستی ناتوانێت ئەم میللەتە بتاوێنێتەوە.